23 жилийн өмнөх энэ өдөр АНУ-ын Нью-Йорк хотод орших “Хоёр өндөр”, ихэр цамхаг нэрээрээ алдартай Дэлхийн худалдааны төв халдлагад өртсөн. Эргэн сануулбал, АНУ-ын агаарын тээврийн “Бойнг-767” хоёр онгоц Дэлхийн худалдааны төвийн хоёр барилгын 60 болон 110 давхрыг мөргөж, дэлбэрсэн байдаг. Харин гурав дахь нь буюу “Бойнг-557” онгоц дээрх хоёр онгоцыг ослыг дахин давтсанаар “Хоёр өндөр”-ийн барилга нурсан. Америкийн түүхэн дэх хамгийн олон хүн амиа алдсан халдлага болж бүртгэгдсэн тус алан хядах ажиллагааны улмаас 3000 орчим хүн амиа алдаж, 25 мянга гаруй хүн бэртэж, гэмтсэн үзүүлэлт байдаг. АНУ-ын тусгай албанаас хоёр өндрийг “Аль-Каида” бүлэглэл алан хядах ажиллагаа явуулж, нураасан талаар мэдээлсэн бөгөөд тухайн үеийн АНУ-ын Ерөнхийлөгч Жорж Бушийн тушаалаар “Аль-Каида” бүлэглэлийн удирдагч Осама бин Ладеныг эрэн сурвалжилж, 2001 оны аравдугаар сарын 7-нд АНУ болно түүний холбоотон орнууд Афганистан дахь бүлэг, хөдөлгөөний төвүүдийг бөмбөгдөж эхэлснээр Афганистаны дайн эхэлсэн гэж үздэг.

Сонирхуулахад, хоёр өндрийн алан хядах ажиллагаа болохоос ердөө жилийн өмнө “Хоёр өндөр”-ийн барилгыг Ларри Силверштэйн гэх баян худалдан авч, даатгуулсан байсан бөгөөд Дэлхийн худалдааны төвийн сүйрлээс хойш 4.5 тэрбум ам.долларын нөхөн олговор авсан байдаг аж. Мөн өнгөрсөн 2022 онд АНУ-ын Холбооны мөрдөх товчооноос хоёр өндрийн алан хядах ажиллагаатай холбоотой баримт бичгийг нууцын зэрэглэлээс гаргана гэж мэдэгдэж байсан ч өнөөг хүртэл нийтэд ил болгоогүй байна. Харин Америкийн төрийн тэргүүнээр ажиллаж байсан үе үеийн Ерөнхийлөгч уг алан хядах ажиллагаатай холбоотой нууцын зэрэглэлд байгаа баримт бичгээс цухуйлгаж байсан бөгөөд АНУ-ын Тусгай алба, Холбооны мөрдөх товчооноос халдлагатай холбоотой гэж үзсэн хэд хэдэн орны Засгийн газар, албан тушаалтан, хувь хүнд шалгалт хийсэн ч холбогдох нотлох баримт олж чадаагүй юм.