АНУ-ын Ерөнхийлөгч Дональд Трамп Ерөнхийлөгчийн суудлаас огцрох гэж буй энэ үед түүний нэр хүнд огцом унасан билээ. Үүнийг даган түүний эхнэр, тэргүүн хатагтай Мелания Трампын нийгэмд эзлэх байр суурь ч мөн унажээ. Тэрбээр санал асуулгаар АНУ-ын түүхэн дэх хамгийн нэр хүнд муутай тэргүүн хатагтай болж, Цагаан ордонг орхиж байна.

CNN агентлагийн санал асуулгаар АНУ-ын иргэдийн 42 хувь нь Мелания Трампд ам сайтай байсан бол 47 хувь нь муу үнэлгээ өгчээ. АНУ-ын үе үеийн тэргүүн хатагтай нар ойролцоо үнэлгээ авдаг бөгөөд 47 хувийн тааламжгүй үнэлгээ гэдэг  хамгийн муу үзүүлэлт аж. Тухайлбал, өмнөх тэргүүн хатагтай Мишель Обамаг иргэдийн 71 хувь нь дэмжиж байсан бөгөөд үе үеийн тэргүүн хатагтай нар 50 хувиас дээш эерэг үнэлгээ авдаг байв.