Хаитигийн томоохон хотуудад дээрмийн бүлэглэлүүд хоорондоо дайсагналцаж, зэвсэгт мөргөлдөөн эхэлжээ. Өнгөрсөн зургадугаар сараас эхэлсэн дээрмийн бүлэглэлүүдийн зэвсэгт мөргөлдөөн Хаитигийн хууль, хүчний байгууллагуудын хяналтаас гарсан бөгөөд бүлэглэлийн гишүүд хотын төвөөр хоорондоо байлдаж байгаад энгийн иргэд, хүүхэд өртөж, амиа алдах тохиолдол их гарч байгаа гэнэ.

Тухайлбал, НҮБ-ын Хүүхдийн сангаас хийсэн судалгаагаар өнгөрсөн зургадугаар сараас хойш Хаитид болж буй мөргөлдөөний улмаас 130 гаруй хүүхэд амиа алдаж, 100 орчим хүүхэд шархадсан байна. Мөн олон улсын хүний эрхийн болон хүүхдийн төлөөх байгууллагуудын хийсэн судалгаагаар Хаитид долоо хоног тутамд таван хүүхэд амиа алдаж, шархдаж байгааг харуулсан үзүүлэлт гарсан бөгөөд дээрэмчид гэр хорооллуудыг шатааж, иргэдийг шатааж, хүчирхийлж байгаагийн эсрэг ойролцоох орнууд, олон улсын байгууллагууд хамтарч ажиллаж, тусламж үзүүлэхийг Хаитигийн эрх баригчид хүсэж байгаа аж.