Индонез Улсын Сулавеси аралд өнгөрсөн шөнө 6.2 магнитуд хүчтэй газар хөдөлж, 67 хүний амь эрсэдсэн тухай Олон улсын Улаан загалмайн нийгэмлэгээс мэдээллээ. Сулавеси арлын хойд хэсэгт байрлах Мажене хотоос зүүн хойд зүгт зургаан км зайд, 10 км гүнээс уг газар хөдлөлт үүссэн байна.

     Мажене хотод газар хөдлөлтийн чичиргээ зургаан секунд үргэлжлэхэд 300 орчим барилга, байгууламж сүйрч, 637 хүн бэртэж, гэмтсэн бөгөөд 15 мянга гаруй иргэнийг тус хотоос нүүлгэн шилжүүлжээ. Газар хөдлөлтийн улмаас амь эрсэдсэн, сураггүй алга болсон хүний тоо цаашиднэмэгдэх төлөвтэй байгааг тус нутгийн онцгой байдлын албанаас мэдээлсэн юм.