Украины зүүн бүсийн нутагт үргэлжилж буй дайны фронтод ОХУ эмэгтэй хоригдлуудыг байлдуулахаар илгээж байгаа талаар “New York Times” сонин мэдээллээ. Тодруулбал, ОХУ-ын Санкт-Петербург хотын ойролцоох эмэгтэйчүүдийн хорих ангиас өнгөрсөн сард хоригдлуудыг Украинд байлдуулахаар суллаж, дайны фронт руу илгээсэн гэнэ. Мөн холбогдох газрууд өнгөрсөн жилээс хойш эмэгтэй хоригдлуудтай цэргийн гэрээ байгуулж эхэлсэн бөгөөд гэрээнд тусгаснаар хоригдлуудад өршөөл үзүүлэхээс гадна сарын 2000 ам.доллароор цалинжуулах юм байна.

Ташрамд дурдахад, “Business Insider” сайтын онцолсноор ОХУ-ын Зэвсэгт хүчин эртнээс шоронгийн хоригдлуудыг дайн, байлдаанд ашиглаж ирсэн гэнэ. Үүний хамгийн ойрын жишээ нь Оросын хөлсний цэргийн “Вагнер” бүлэг 40 мянга орчим хоригдол алба хааж байгаа аж.