Дэлхийн хамгийн өндөр настай хүн Хуан Висенте Перес 114 насандаа таалал төгссөн талаар талийгаачийн ар гэрийнхэн мэдээлжээ. Тэрээр ирэх сард 115 нас хүрэх байсан бөгөөд Венесуэлийн Ерөнхийлөгч Николас Мадуро энэ тухай “Хуан Висенте Перес Мора 114 насандаа ертөнцийн мөнх бусыг үзүүллээ” хэмээн албан ёсны цахим хуудастаа бичсэн байна.

                         Хуан Висенте Перес нь 1909 оны тавдугаар сарын 27-нд Венесуэлийн Тачира мужийн Эль-Кобре гэх хотод төржээ. Түүнийг 2022 онд 112 настай байхад нь Гиннесийн номонд дэлхийн хамгийн өндөр настай хүн хэмээн бүртгэж авсан байдаг бөгөөд Хуан Висенте Перес тухайн үед 11 хүүхэд, 41 ач, зээ, 18 гуч, 12 дөчтэй байсан аж.