Шавиа бэлтгэж, чиглүүлж чадаагүй гэх шалтгаанаар хоёр зиндаа буурах шийтгэл сонссон Хакүхо М.Даваажаргал дэвжээгээ удирдах эрхгүй болж, Мияагино дэвжээг Тамагаки удирдахаар болжээ.

Тодруулбал, Японы мэргэжлийн сүмод барилддаг монгол сүмоч Хокүсейхо А.Даваанинж дэвжээний бөхчүүдээ дээрэлхэж, дарамталдаг гэх мэдээлэлтэй холбоотойгоор Сүмогийн холбооноос А.Даваанинжийг зодог тайлуулж, дэвжээнийх нь багш Хакүхо М.Даваажаргалын зэргийг хоёр шатаар буулгаж, цалингийн шийтгэл ногдуулсан. Тэгвэл хоёр зиндаа буурах шийтгэлтэй холбоотойгоор зиндаагаа удирдах эрхгүй болсон Хакүхо М.Даваажаргалын оронд Тамагаки Мияагино дэвжээг хацү башёд удирдаж орохоор болсон талаар Сүмогийн холбооноос мэдэгджээ.

                      Мияагино дэвжээг удирдах болсон Тамагаки нь өдгөө 59 настай бөгөөд Томохана гэх нэрээр барилдаж байсан аж. 27 насандаа мэргэжлийн сүмогийн замналаа эхлүүлж байсан Тамагаки комүсүби цолд хүрч байсан юм байна. Харин Тамагаки Хакүхо болон Мияагино дэвжээний талаар “Энэ бол ноцтой асуудал. Сүмогийн холбоо нэлээн хатуу байр суурьтай байгаа. Тиймээс бөхчүүд ч нөхцөл байдлыг ойлгож, хариуцлагатай хандаасай гэж хүсэж байна” хэмээн байр сууриа илэрхийлжээ.