Оросын сөрөг хүчний удирдагч Алексей Навальный өнгөрсөн долоо хоногт хорих ангид нас барсан. Нас барснаас нь хойш талийгаачийн цогцсыг ар гэрийнхэнд нь хуулиар зөвшөөрөгдсөн хугацаанд өгөөгүй талаар А.Навальныйгийн хэвлэлийн төлөөлөгч мэдэгдсэн. Түүнчлэн хэвлэлийн төлөөлөгч болон ар гэрийнхэн нь цогцос хадгалах байранд очсон ч талийгаачийн цогцос байгаагүй талаар мэдээлсэн.

Харин шинэ мэдээллээр А.Навальныйгийн ээжийг хүүг нь нууцаар оршуулахыг зөвшөөрөхийг шаардсан гэнэ. Тухайлбал, хүүг нууцаар оршуулахыг зөвшөөрч, А.Навальный гаднын нөлөөгүй нас барсан тухай тэмдэглэсэн нас барсны гэрчилгээнд гарын үсэг зурахыг шаардсан талаар А.Навальныйгийн хэвлэлийн төлөөлөгч мэдэгджээ. Мөн хэвлэлийн төлөөлөгч Кира Ярмыш "Тэд Владимир Путины тушаалаар Алексей Навальныйг хөнөөсөн. Одоо үхлийн шалтгааныг нууцлах гэж оролдож байна" хэмээсэн байна.