Филиппинд “DJ Жонни Уолкер” нэрээрээ танигдсан сэтгүүлч Хуан Жумалон шууд нэвтрүүлгийнхээ үеэр буудуулж амиа алджээ. Тодруулбал, хэрэг өнгөрсөн амралтын өдрийн өглөө болсон бөгөөд сэтгүүлч Хуан Жумалоныг Каламба хот дахь гэрээсээ шууд дамжуулалт хийж байхад нь үл таних этгээд очиж, буудан хөнөөсөн байна. Эх сурвалжийн мэдээллээр үл таних этгээд сэтгүүлчийн студи руу сонсогчийн дүр эсгэж орсон бөгөөд Хуан Жумалоныг цээжин тус газар нь хоёр буудаж, алтан гинжийг нь булааж, студийн гадна мотоцикльтой хүлээж байсан хамсаатантайгаа хамт зугтсан аж.

                        Филиппин Улсад 1986 онд ардчилал сэргэсэн ч тэр цагаас хойш 199 сэтгүүлч зуурдаар амиа алдаад байгаа юм байна. Сэтгүүлч шууд нэвтрүүлгийнхээ үеэр буудуулж, амиа алдсан хэрэгтэй холбоотойгоор Филиппиний Үндэсний сэтгүүлчдийн нэгдсэн холбооноос шалгалтын ажиллагааг түргэн шуурхай явуулж, үр дүн гаргаж өгөх хүсэлт гаргаад байгаа бөгөөд тус улсын Ерөнхийлөгчийн дэргэдэх Хэвлэл мэдээллийн аюулгүй байдлын ажлын албаны дарга Пол Гутиеррес “Сэтгүүлч Хуан Жумалоны амиа алдсан хэргийн сэдэл тодорхойгүй байгаа ч урьдчилсан байдлаар эрхэлдэг ажил, мэргэжилтэй нь холбоотой гэж үзээд байгаа” талаар мэдэгджээ.