Сингапурын шүүхээс таван жилийн өмнө 30 грамм хар тамхи зөөвөрлөж байгаад баригдсан Саридеви Жамани гэх эмэгтэйд цаазаар авах яг ногдуулжээ. Ингэснээр Сингапур Улс түүхэндээ хоёр дахь удаагаа эмэгтэй хүнд цаазын ял ногдуулж байгааг олон улсын хэвлэлүүд онцолж байна. Харин эхнийх нь одоогоос 20 жилийн өмнө буюу 2003 онд мөн хар тамхины хэрэгтэй холбоотойгоор нэгэн эмэгтэйд цаазын ял ногдуулсан аж.

                        Сингапур дэлхийд хар тамхины эсрэг хатуу хуультайгаараа алдартай. НҮБ, олон улсын хүмүүнлэгийн байгууллагаас Сингапураас ялынхаа хэмжээг багасгахыг удаа дараа хүсэж байсан ч хүсэлтийг нь авч байгаагүй. Өнгөрсөн 2022 онд Сингапурт 12 хүнд цаазаар авах ял ногдуулсан бөгөөд тэдний нэг нь гурван амны халбагын хэмжээтэй хар тамхи өөрөө ч мэдэлгүй тээвэрлэж байсан оюуны хомстолтой эр байсан гэнэ. Харин энэ оны гуравдугаар сараас хойш хэдийнэ 15 хүн хар тамхины хэрэгтэй холбоотойгоор шүүхээс ял сонсоод байгаа юм байна.