Францын Нант хотын түүхийн музей ӨМӨЗО-ны Хөх хотын музейтэй хамтран ирэх долоо хоногт “Монголын эзэнт гүрний үүсэл, Чингис хаан” үзэсгэлэнг дэлгэхээр төлөвлөж байсан юм. Гэвч коронавирустэй холбоотойгоор үзэсгэлэнг 2021 онд зохион байгуулахаар хойшлуулсан. Тэгвэл Хятадын зүгээс үзэсгэлэнд хяналт тавьж, “Чингис хаан, Монгол, Эзэнт гүрэн” зэрэг үгсийг хэрэглэхгүй байхыг шаардсан тул үзэсгэлэн гаргах хугацааг 2024 он хүртэл, гурван жилээр хойшлуулжээ.

Тус шаардлагыг эсэргүүцэн Францын Нант хотын түүхийн музейн захирал Бэртранд Гуйллет “Бид хүн төрөлхтөн, шинжлэх ухаан, ёс суртахууныг гуйвуулсан үзэсгэлэн гаргахгүй байхаар шийдсэн.  Хятад Улс Чингис хааны үзэсгэлэнг Монголын удирдагчийн нэрээр нэрлэхээс зайлсхийж, түүхийг шинээр бичих гэж байна” хэмээн эсэргүүцлээ зарлажээ.

Мөн музейн зүгээс “Бид Монголын түүхийг зөвхөн Хятадын талаас харуулах үзэсгэлэн гаргахыг эсэргүүцэж байна. Иймд үзэсгэлэнг гурван жилээр хойшлууллаа” гэж мэдэгдэв.