ДЭЛХИЙН АВАРГА ЮРИ ЖОРКАЕФФ

Францын хөл бөмбөгийн шигшээ багийн тамирчин асан Юри Жоркаефф энэ оны дөрөвдүгээр сарын дундуур Монгол Улсад ирсэн. 1998 оны дэлхийн аварга Юри Жоркаефф өдгөө Олон улсын хөл бөмбөгийн холбооны сангийн захирлаар ажиллаж байгаа бөгөөд Монголын хөл бөмбөгийн холбоо, Боловсролын ерөнхий газартай хамтран хэрэгжүүлж байгаа “Football for School” хөтөлбөрийн хүрээнд манай оронд айлчилсан юм.Дэлхийн аварга Юри Жоркаефф айлчлалаа дуусгасны дараа Монголын хөл бөмбөгийн холбооны талбайд Монголын тамирчидтай нөхөрсөг тоглолт хийсэн. Мөн түүний хамт БНСУ-ын шигшээ багийн тамирчин асан Ча Бум Кум, Чу Ду Ри нар ирсэн юм.

СТЕФАН СТОЯЧИЧ ТЭРГҮҮТЭЙ АВСТРИЙН ШИГШЭЭ БАГ

Улаанбаатар хотод болсон 3х3 сагсан бөмбөгийн нээлттэй тэмцээнд ирж оролцсон Стефан Стоячич тэргүүтэй Австрийн “Вена” баг тэмцээний дараа Монголд үлдэж, орон нутгаар аялжээ. Дэлхийн тэмцээнд олон таарч, эсрэг багаас өрсөлдөж байсан ч Стефан Стоячичтай найзууд болсон Монголын 3х3 сагсан бөмбөгийн шигшээ багийн тамирчин Д.Дэлгэрням түүнийг багийнх нь хамтрагч Нико Калтенбруннер, Филип Крамер, Маттиас Линортнер нартай хамт хөдөө аав, ээжийндээ аваачсан талаар Австрийн шигшээгийн тамирчид цахим хаягаараа мэдээлсэн байна. Харин түүнийг харсан монгол дэмжигчид “Гадаад хүнд яагаад даага унуулчихсан юм бэ”, “Том биетэй, өндөр хүн эмээл дээр тохом шиг л харагдаж байна” гэх зэргээр сэтгэгдлээ бичжээ.

LIL PUMP

Америкийн шилдэг залуу репперүүдийн нэг Lil Pump буюу Газзи Гарсиа өнгөрсөн сард “Хуур” хөгжмийн наадамд оролцохоор Монгол Улсад ирсэн. 22 насныхаа төрсөн өдрөөр Монголд газардсан реппер Lil Pump “Шангри-Ла” зочид буудалд баяраа тэмдэглэж, баярын бялуугаа буудлын цонхонд нялсан дүрс бичлэг нь цахим сүлжээнд цацагдаж, сошиалд шүүмжлэл дагуулсан. Lil Pump наймдугаар сарын 19-нд болох хөгжмийн наадамд оролцохоор ирж, хоёр хоноод, Азийн бусад оронд аялан тоглолтоо хийхээр явсан юм. Түүний “Gucci Gang” дуу нь “Youtube” сувагт 1.1 тэрбум хандалттай. Мөн уг дуу тухайн онд АНУ-ын Billboard-ын топ гуравт орсон байдаг