Эргэлт.мн мэдээллийн сайт “Тэд бидний тухай” буландаа олон улсын хэвлэл мэдээллийн сайт, агентлагуудад Монгол Улсын тухай бичсэн нийтлэлийг хөрвүүлэн хүргэдэг. Тэгвэл энэ удаагийн дугаартаа гаднын мэдээллийн сайтуудын Монгол Улсын Ерөнхий сайд Л.Оюун-Эрдэнэ Пакистаны Исламабад хотод болсон ШХАБ-ын гишүүн болон ажиглагч орнуудын Засгийн газрын тэргүүн нарын зөвлөлийн өргөтгөсөн хуралдаанд оролцсон талаар нийтлэлийг хөрвүүлэн хүргэж байна.

ШХАБ-ЫН ГИШҮҮН БОЛОН АЖИГЛАГЧ ОРНУУДЫН ЕРӨНХИЙ САЙД НАРЫН ЗӨВЛӨЛИЙН ӨРГӨТГӨСӨН ХУРАЛДААН

Исламын Бүгд Найрамдах Пакистан Улсын нийслэл Исламбад хотод ШХАБ-ын гишүүн болон ажиглагч орнуудын Засгийн газрын тэргүүн нарын зөвлөлийн өргөтгөсөн хуралдаан болж өндөрлөлөө. Тус өргөтгөсөн хуралдаанаар хэлэлцсэн чухал сэдвүүдийг тодруулбал,

Бүс нутгийн аюулгүй байдлыг бэхжүүлэх:

• Улс орнууд терроризм, экстремизм, хар тамхины хууль бус наймаа зэрэг аюултай тэмцэхэд хамтран ажиллах шаардлагтай байна.

Эдийн засгийн сэргэлт:

• Өргөтгөсөн хурлын гол анхаарлын төвд орсон асуудлуудын нэг нь эдийн засгийн сэргэлт байв. Хуралдаанаар нэн онцлох асуудлаар яригдсан бөгөөд ШХАБ-ын гишүүн болон ажиглагч орнууд хамтран эдийн засгийн өсөлтөд түлхэц өгөхийг зорихоо амласан.

“Бүс ба зам” санаачилгыг урагшлуулах:

• БНХАУ-ын “Бүс ба зам” санаачилга ШХАБ-ын дээд хэмжээний уулзалтын нэгэн том сэдэв байсан бөгөөд ойрын ирээдүйд санаачилгыг улам өргөжүүлж, гүнзгийрүүлэх талаар гишүүн орнууд санал нэгдсэн.

Иргэд хоорондын харилцан ойлголцлыг нэмэгдүүлэх:

• Энэ удаагийн өргөтгөсөн хуралдааны хамгийн гол сэдэв хамтын ажиллагаа. Гэхдээ хамтын ажиллагааны нэг томоохон чиглэл нь соёлын болон хүмүүнлэгийн тусламж, солилцоог хөгжүүлж, гишүүн, ажиглагч орнуудын иргэд хоорондын итгэлцэл, харилцан ойлголцлыг нэмэгдүүлэхэд анхаарч ажиллах талаар ярилцав.

​

Тэгвэл бүс нутгийн хэмжээнд хамтын ажиллагаагаа илүү өргөжүүлж, бэхжүүлэх асуудлыг хэлэлцсэн тус хуралдаанд Монгол Улсыг төлөөлөн тус улсын Ерөнхий сайд Л.Оюун-Эрдэнэ оролцсон. Тухайлбал, Ерөнхий сайд Л.Оюун-Эрдэнэ Исламабад болсон ШХАБ-ын дээд хэмжээний уулзалтаар Монгол, ОХУ, БНХАУ-ын Засгийн газрын тэргүүн нарын гурван талт уулзалтад оролцож, зохион байгуулагч орон Пакистан Улсын Ерөнхий сайд Шехбаз Шариф, ОХУ-ын Засгийн газрын дарга М.В.Мишустин, БНХАУ-ын Төрийн зөвлөлийн Ерөнхий сайд Ли Чян нартай хоёр талын уулзалт хийсэн байна. Улмаар Монгол Улсын Ерөнхий сайд Л.Оюун-Эрдэнэ ШХАБ-ын гишүүн болон ажиглагч орнуудын Засгийн газрын тэргүүн нарын зөвлөлийн өргөтгөсөн хуралдаанд оролцож үг хэлжээ. Тодруулбал, Ерөнхий сайд Л.Оюун-Эрдэнэ

• Бүс нутагт энх тайван, тогтвортой, аюулгүй байдлыг бэхжүүлэх, улс төр, эдийн засаг, соёл болон хүмүүнлэгийн салбарын хамтын ажиллагааг өргөжүүлэн хөгжүүлэхэд ШХАБ чухал үүрэг гүйцэтгэх механизм болон төлөвшин хөгжиж байгаад Монгол Улс сэтгэл хангалуун байдаг
• Монгол Улс ШХАБ-тай болон ШХАБ-ын гишүүн орнуудтай эдийн засаг, дэд бүтцийн салбарт идэвхтэй хамтран ажиллаж, худалдаа, хөрөнгө оруулалт, хүнс, хөдөө аж ахуй, уул уурхай, эрчим хүч, аж үйлдвэржилт, тээвэр логистик, боомтын дэд бүтэц, байгаль орчин, ногоон хөгжил, ногоон шилжилт, аялал жуулчлал, мэдээллийн технологи, AI хиймэл оюун болон хүмүүнлэгийн салбарт харилцан ашигтай хамтын ажиллагаа хөгжүүлэхийн төлөө хичээн ажиллах болно
• Цаашид улс орнуудтай төмөр зам, дэд бүтэц, эрчим хүч, хөдөө аж ахуй, аялал жуулчлалын салбарт хөрөнгө оруулалтыг дэмжиж, харилцан ашигтай хамтарч ажиллахад бэлэн.

​

• Хурдтай хөгжиж байгаа технологийн үед хиймэл оюун ухаан болон хурдтай технологийн хөгжил бүс нутгийн хэмжээнд хэрхэн нөлөө үзүүлэхийг цаашдын стратегидээ илүү анхаарч үзвэл чухал байна.
• Уул уурхайн салбар дээр эдийн засаг нь тогтдог Монгол Улстай адил эдийн засгийн бүтэцтэй улс орнуудад ногоон хөгжлийн загвар хэрхэн өрнөх вэ гэдэг дээр бүс нутгийн хэмжээнд стратегиа тодорхойлбол илүү чухал байх болов уу.
• Өдрөөс өдөрт хүний нөөц хомсдож байна. Улс орнуудад төрөлт багасаж байна. Ажиллах хүчний хомсдолд орж байна. Боловсролын салбар хурдтай хөгжиж байгаа ногоон эдийн засгийн хөгжилтэй уялдахгүй байна зэрэг асуудал үүсэж байна. Тийм учраас ШХАБ хүний нөөцийн ирээдүйн чиг хандлагыг тодорхойлж, хиймэл оюун ухаан, ногоон хөгжил бүс нутгийн эдийн засагт хэрхэн нөлөөлөх вэ гэдэг механизмийг гаргах нь бидний цаашдын хөгжилд хэрэгтэй зэрэг асуудлуудыг хөндөн өргөтгөсөн хуралдаанд хэлсэн үгэндээ онцолсон байна.

МОНГОЛ, ОХУ, БНХАУ-ЫН ГУРВАН ТАЛТ УУЛЗАЛТ

ШХАБ-ын гишүүн болон ажиглагч орнуудын Засгийн газрын тэргүүн нарын өргөтгөсөн хуралдааны үеэр Монгол Улсын Ерөнхий сайд Л.Оюун-Эрдэнэ ОХУ-ын Засгийн газрын дарга М.В.Мишустин, БНХАУ-ын Төрийн зөвлөлийн Ерөнхий сайд Ли Чян нартай гурван талт уулзалт хийсэн. Гурван талт уулзалтаар Монгол, ОХУ, БНХАУ-ын төрийн тэргүүн нарын тохиролцоог бодит ажил хэрэг болгох, худалдаа, эдийн засгийн хамтын ажиллагааг эрчимжүүлэх, эдийн засгийн коридорын томоохон төсөл, хөтөлбөрүүдийг бодитоор хэрэгжүүлэх асуудлууд яригдав.

Тухайлбал, Монголын нутгаар дамжин өнгөрөх ОХУ-аас БНХАУ руу байгалийн хий нийлүүлэх хоолойг гурван талын хамтын ажиллагааны түвшинд хэрэгжүүлэх, сэргээгдэх эрчим хүчний эх үүсвэрүүдийн хамтран бий болгох, гурван улсын аялал жуулчлалын жишиг бүс байгуулах, улсын хил дамнасан цахим худалдааны платформ бий болгох, боловсрол, шинжлэх ухаан, соёл, хүмүүнлэг, гамшигтай тэмцэх зэрэг чиглэлд илүү өргөн хүрээнд хамтарч ажиллах саналууд гарч иржээ. Түүнчлэн Монгол Улсын “Талын зам” хөтөлбөр, Евразийн эдийн засгийн холбоо, БНХАУ-ын “Бүс ба зам” санаачилгыг харилцан уялдуулж, “Монгол, Орос, Хятадын эдийн засгийн коридорыг бүтээн байгуулахад Монголын тал бэлэн байгаа”-г Ерөнхий сайд Л.Оюун-Эрдэнэ хэлжээ. Улмаар гурван улсын эдийн засгийн коридор байгуулах хөтөлбөрт хамруулах 33 төслийн жагсаалтыг Монголын талын холбогдох байгууллагууд харилцан тохиролцсон бөгөөд Замын-Үүд-Алтанбулаг чиглэлийн шинэ төмөр зам барих төслийг эхний ээлжинд хэрэгжүүлэх санал гаргасан байна.

Харин гурван талт уулзалтад оролцсон ОХУ-ын Засгийн газрын дарга М.Мишустин, БНХАУ-ын Төрийн зөвлөлийн Ерөнхий сайд ли Чян нар түүний саналыг дэмжиж буйгаа илэрхийлж, төрийн тэргүүн нарын тохиролцсон ажлуудыг бодит ажил болгож, Монгол Улстай эрчим хүчний төслүүдийг хамтран  хэрэгжүүлэхээр ажиллаж байгаа талаараа мэдэгджээ. Улмаар талууд санал нэгдэж, дараагийн гурван улсын Засгийн газрын тэргүүн нарын уулзалтаа ирэх 2025 онд зохион байгуулахаар ярилцсан аж.

МОНГОЛ УЛС БНХАУ-ЫН “CHINA ENERGY”-ТЭЙ ХАМТРАН БООМТЫН ХИЛ ХОЛБОЛТОО ЭРЧИМЖҮҮЛЭХЭЭР БОЛЛОО

Монгол Улсын Ерөнхий сайд Л.Оюун-Эрдэнэ ШХАБ-ын дээд хэмжээний уулзалтаар оролцоод буцах замдаа БНХАУ-д айлчилжээ. Тухайлбал, энэ онд Монгол Улс, БНХАУ-ын хооронд дипломат харилцаа тогтоосны 75 жилийн ой тохиож буй бөгөөд уг ойд зориулан БНХАУ-д зохион байгуулагдсан арга хэмжээнд Монгол Улсын Ерөнхий сайд Л.Оюун-Эрдэнэ оролцсон байна. Харин БНХАУ-д ажиллах үеэрээ Ерөнхий сайд Л.Оюун-Эрдэнэ Хятадын төрийн өмчит “Чайна Энержи” группийн ТУЗ-ийн дарга Люй Гуоюэтэй уулзаж, зарим онцлох асуудлын талаар ярьсан аж. Дэлгэрүүлбэл, 2024 оны дөрөвдүгээр сарын 2-нд Монгол Улсын Засгийн газар, БНХАУ-ын Засгийн газар хооронд “Гашуунсухайт-Ганцмод боомтын хил дамнасан төмөр замын гүүр хамтран барих тухай’’ хэлэлцээр байгуулсан. Тэгвэл уг хэлэлцээрийн хүрээнд хил холболтыг идэвхжүүлж, гүүр барих ажлыг эрчимжүүлэх саналтай байгаа талаараа Монголын тал илэрхийлсэн байна. Харин “Чайна Энержи” группийн ТУЗ-ийн дарга Лю Гуоюэ уг саналыг дэмжиж буйгаа илэрхийлж, хоёр тал Гашуунсухайт-Ганц мод боомтын хилийн холболтыг эрчимжүүлэхэд хамтарч ажиллахаар санал нэгдээд байгаа аж.