ОХУ Украинд цэргийн тусгай ажиллагаа явуулж байгаатай холбоотойгоор олон улс ОХУ-ын эсрэг хориг арга хэмжээ авч эхэлсэн.

          Украинаас салан тусгаарлагч Донецк, Луганск мужийн БНУ-ын статусыг хүлээн зөвшөөрч, гэрээнд гарын үсэг зурсантай холбоотойгоор Герман Улсын канцлер Олаф Шольц Орос-Герман хүртэл байгалийн хий дамжуулах хоолой бүтээх “Хойд урсгал-2” төслийг зогсоосон. Мөн АНУ, Японоос ОХУ-ын банк, томоохон уул уурхайн компаниудын хөрөнгийг царцааж, албан тушаалтнуудад хориг тавив.

          Харин Европын холбооноос Украинд санхүү болон хүмүүнлэгийн тусламж үзүүлэхээ мэдэгдэж, ОХУ-ын нэр бүхий албан тушаалтнуудад хориг тавьсан. Мөн Европын холбоо дахин хуралдаж, ОХУ-ын мэдээллийн агентлаг, нисэх онгоцонд хориг тавьж, томоохон банкуудыг нь олон улсын гүйлгээний систем SWIFT-ээс салгасан. Олон улсын ОХУ-ын эсрэг тавьсан хориг арга хэмжээ олон болж байгаа ч, эсрэгээрээ үр дүн багатай байж болзошгүй талаар шинжээчид мэдэгдэж байна.

-ЯМАР ОРНУУД УКРАИНЫГ ДЭМЖИЖ БАЙГАА ВЭ-

Олон улсын томоохон мэдээллийн агентлагуудын цуглуулж, нэгтгэсэн мэдээллээр “BBC” агентлаг Зүүн Европт үүсээд байгаа асуудлаар Украиныг дэмжиж байгаа орнуудыг жагсаажээ

Үүнд:

• АНУ, Канад, Их Британи тэргүүтэй НАТО-гийн орнууд,
• НАТО-гийн гишүүн бус Австрали, Израйль, Тайвань,
• Франц, Герман, Итали, Япон тэргүүтэй дэлхийд эдийн засгаараа тэргүүлдэг “Их долоо” бүлгийн гишүүд
• Бенин, Буркина Фасо, Кабо Верде, Кот-Дивуар, Гамби, Гана, Гвиней, Гвиней Бисау, Либери, Мали, Нигер, Нигери, Сенегал, Сьерра-Леон, Того нарын “эко” тодотголтой 29 орон багтаж байна.

          Одоогийн байдлаар Украины талыг дэмжигч, НАТО-гийн гишүүн орнууд зэвсэг, хамгаалалтын системээр хангахаа зарлаад байгаа. “Их долоо”-гийн бүлгээс ОХУ-ын нэр бүхий албан тушаалтны хөрөнгийг царцааж, хориг арга хэмжээ авсан. Харин бусад Украиныг дэмжигч орнууд албан ёсоор зарласан тодорхой төлөвлөгөөгүй байгаа юм.

-ОХУ-ЫН ТАЛЫН ОРНУУД-

Зүүн Европ дахь мөргөлдөөнд ОХУ-ыг дэмжиг орноос тус улсын тэргүүлдэг Хамгийн аюулгүй байдлын гэрээний байгууллагын орнууд багтаж байна. Үүнд:

• Армен
• Беларусь
• Казахстан
• Киргизстан
• Тажикистан зэрэг орон багтжээ.

Тэгвэл дээрх дурдсан орнуудаас өөр нэгэн орон “албан бусаар” багтаж байгаа нь Хойд Солонгос. ОХУ-ын цэргийн тусгай ажиллагааг эсэргүүцэж, Украин Улсын нутаг дэвсгэрээс цэргээ гаргахыг шаардсан НҮБ-ын Ерөнхий Ассамблейн тогтоолд тус байгууллагын 193 гишүүн орон саналаа өгсөн. Харин тус саналыг эсэргүүцсэн буюу ОХУ-ыг дэмжсэн санал өгсөн орнуудын нэгт Хойд Солонгос багтсан юм.

          ОХУ Украинд цэргийн тусгай ажиллагаагаа эхлэх үед Оросын цэргүүд Беларусийн нутаг дэвсгэрээс дайрч эхэлсэн. Харин үүнийг Беларусь Улсын Ерөнхийлөгч Александр Лукашенко үгүйсгэж байгаа юм. Тэрбээр “НАТО-гийн орнууд худал мэдээлэл тарааж байна. Оросын цэргүүд манай улсын хилээс дайраагүй, манай орон ч ОХУ-ын цэргийн тусгай ажиллагаанд оролцохгүй” гэсэн байна.

-ТӨВИЙГ САХИГСАД-

ОХУ, Украины асуудалд төвийг сахисан буюу тодорхойгүй байр суурь илэрхийлсэн, түүнийгээ хадгалж үлдсэн хэд хэдэн орон бий. Үүнд:

• БНХАУ
• Энэтхэг
• Иран
• Пакистан Улс багтаж байгаа юм.

Олон улсын мэдээллийн хэрэгслээр “Дайныг дэмжихгүй” гэж мэдэгдсэн ч, далдуур ОХУ-ыг дэмжиж байж болзошгүй орнууд. Иран, Пакистаныг “Дайныг хүсэх байгаа” гэсэн ч, НҮБ-ын Ерөнхий Ассамблейн тогтоолоос эхлүүлээд Оросыг дэмжиж байгаа нь илт байгаа аж.

          Тэгвэл Украинд явуулж байгаа ОХУ-ын цэргийн тусгай ажиллагааны “далд дэмжигч” гэж нэрлэгдээд байгаа БНХАУ одоог хүртэл төвийг сахисан байр сууриа илэрхийлсээр байна. Тухайлбал, олон улсын хэвлэлүүдээр ОХУ-ыг санхүүжүүлэгч нь БНХАУ. ОХУ-д олон улсаас хориг арга хэмжээ авсан ч, цаашид БНХАУ-аас санхүүжилтээ авах тухай мэдээлж байв. Харин уг мэдээллийг Бээжингээс үгүйсгэж, БНХАУ-ын Гадаад хэргийн яамны хэвлэлийн төлөөлөгч Ван Вэнбин “Энэ бүрэн НАТО-гийн өдөөн хатгалгын үр дүн. Үүнээс үүдсэн асуудал дахь Москвагийн байр суурь бидний санааг зовоож байна” хэмээн мэдэгджээ.