Казахстан даяар эсэргүүцлийн жагсаал ширүүсэж, бослого болж, тус улсын Засгийн газар бүрэн бүрэлдэхүүнээрээ огцорсон. Ерөнхийлөгч Касым-Жомарт Токаев бослогын талаар “Босогчдыг гадаадад бэлдсэн зохион байгуулалттай бослого” хэмээн тодотгож, гаднын орнуудаас тусламж хүссэн.

          Хамгийн сүүлийн мэдээллээр ОХУ тэргүүтэй Хамтын аюулгүй байдлын гэрээний Беларусь, Армени, Тажикистан Улс үймэнийг дарахад тусламж үзүүлэхээ мэдэгдсэн. Одоогийн байдлаар Казахстан Улсад ОХУ-ын цэргийн хүч хамгийн түрүүнд очиж, байрлаад байгаа юм.

Аюулгүйн хүчнийхэн жагсагчдын эсрэг нулимс асгаруулагч, хийн гранат ашигласан. Харин жагсагчдын нэг нь аюулгүйн хүчнийхний өмнөөс гал нээснээр зэвсэгт мөргөлдөөн болов. Алматы тэргүүтэй Казахстаны томоохон гурван хотод жагсагчид орон нутгийн Захиргааны байгууллага, цагдаа, прокурорын газар руу халдаж, галдан шатаасан байна.

          Казахстаны үймээнд 12 аюулгүйн хүчний алба хаагч, амиа алдаж, 300 гаруй цагдаа, цэргийнхэн шархаджээ. Харин энгийн иргэд, жагсагчдын дотор хэдэн хүн амиа алдсан тоог албан ёсоор гаргаагүй ч, олон тооны жагсагч аюулгүйн хүчнийхэн болон мэргэн буучдад буудуулж, амиа алдсан аж. Амиа алдсан жагсагчдын олонх нь 20-30 насны залуус байсан талаарх албан бус мэдээлэл бий.

Жагсагчид ямар шаардлага тавьсан бэ

          Шатахууны үнийн гэнэтийн өсөлттэй холбоотойгоор Казахстан Улс даяар эсэргүүцлийн жагсаал эхэлсэн. Казахстаны Засгийн газраас 2022 он гармагц шатахууны үнийн хяналтыг цуцалж, Мангистау мужид өргөн хэрэглээний шатахууны үнэ литр тутамдаа 11 центээр өсжээ. Шатахууны үнийн өсөлттэй холбоотойгоор эхэлсэн жагсагчид тус улсын Ерөнхийлөгч асан Нурсултан Назарбаев, улстөр, эдийн засгийн хэд хэдэн шаардлага тавьсан юм. Үүнд:

• Хүнсний үнэ бууруулах,
• Шатахууны үнэ бууруулах,
• Тэтгэвэрт гарах насыг 58/60 болгох бууруулах,
• Засгийн газрыг бүрэн бүрэлдэхүүнээр нь огцруулах,
• Жагсаалын үеэр хоригдож байсан бүх хоригдлыг суллах,
• Энгийн иргэдийн цалинг нэмэгдүүлэх,
• Үндэсний компаниудын бүх охин компанийг татан буулгах,
• Хог хаягдал цуглуулахыг цуцлах,
• Казахстаны тээврийн хэрэгслийн төлбөртэй замыг цуцлах,
• Тэтгэврийн доод хэмжээг нэмэгдүүлэх,
• Хүүхдийн тэтгэмжийг нэмэгдүүлэх,
• Ерөнхийлөгч Касым-Жомарт Токаевтай уулзаж, улс төрийн шаардлага тавих зэрэг зүйлийг шаардаж байгаа юм.

-Улстөрийн “боол” Казахстан-

Казахстан Улсад болж байгаа үймээний талаар олон улсын шинжээчид “Улстөрийн сөрөг хүчингүй байсан” нь нөлөөлсөн гэж үзэж байгаа. “Нэг намын засаглалд олон жилийн турш байсан казахстанчуудын уур хилэн ийн гарч ирсэн” талаар л мэдэгдэж байна.

          Нөгөөтээгүүр 30 жилийн турш төрийн тэргүүний алба хашсан Нурсултан Назарбаев 2019 онд Ерөнхийлөгчийн суудлаасаа буусан ч, өнөөг хүртэл улстөрийн асуудалд оролцсоор ирсэн нь нөлөөлжээ. Тэгвэл зарим эх сурвалжийн мэдээлснээр Казахстан Улс гаднын орны хараат байсан нь үймээн дэгдэхэд нөлөөлсөн гэх.

Казахстан Улсын Дотоод хэргийн яамнаас тусгай ажиллагаа явуулж, хэдэн зуун жагсагчийн баривчилснаар үймээний цар хүрээ багасаж байна. Улмаар Хамтын аюулгүй байдлын гэрээний цэргүүд Казахстанд орж, бослогыг хүчээр дарахаар төлөвлөж байгаа юм.

Казахстан Улсын Ерөнхийлөгч Касым-Жомарт Токаевын хийсэн мэдэгдэлдээ “Төрийн тэргүүний хувьд энэ асуудлын эсрэг хатуу арга хэмжээ авахаар төлөвлөсөн. Энэ бол Казахстан Улсын аюулгүй байдлын түвшний асуудал. Ард түмэн намайг дэмжинэ гэдэгт итгэлтэй байна” хэмээсэн юм. Олон улс судлаачид “Улстөр, эдийн засгийн хараат байдлаас үүдсэн Казахстаны бослогыг цус урсгаж байж л дарах нь” гэж анхааруулж байна.