Өнөөдрөөс 365 хоногийн өмнө буюу 2020 оны арваннэгдүгээр сарын 11-нд дэлхий даяар “Ковид-19” цар тахлын 50 сая гаруй тохиолдол батлагдаад байлаа. Харин өчигдрийн байдлаар дэлхийд нийт батлагдсан коронавирусийн тохиолдлын тоо 251 саяд хүрээд байгаа юм.

-Нэг жилийн хугацаанд дэлхийд коронавирусийн 201 сая шинэ тохиолдол бүртгэгдэж, дөрвөн сая хүн нас баржээ-

          Жилийн өмнөх энэ өдөр АНУ-ын 10 сая тохиолдол бүртгэгдэж, 240 мянган хүн коронавирусийн хүндрэлийн улмаас нас барсан тохиолдол дэлхийн сөрөг амжилтыг шинэчилж, Франц Улсын нийт нас баралтын 25 хувийг цар тахлын улмаас амиа алдах хүний тоо эзэлж байв.

          365 хоногийн өмнө дэлхийд бүртгэгдсэн нийт коронавирусийн тохиолдлын тоо 50 саяд хүрч, 1.25 сая иргэн нас барсан нь сөрөг дээд амжилт болсон. Тэгвэл тэр цагаас яг нэг жилийн дотор шинээр 201 сая коронавирусийн тохиолдол илэрч, дөрвөн сая хүн нас барсан байна. Өчигдрийн байдлаар дэлхийд нийт 251 сая халдвар тохиолдол бүртгэгдэж, таван сая хүн коронавирусийн хүндрэлийн улмаас амиа алдаад байгаа юм.

-ДЭМБ-аас коронавирусийн найман вакцинд зөвшөөрөл олгоод байна-

Жилийн өмнөх энэ өдөр “Пфайзер” компаниас коронавирусийн эсрэг туршиж байгаа вакциныхаа талаар эерэг мэдээллийг түгээж, түрүүлж гишгэх гээд бүдэрсэн ОХУ-ын спутник-в вакцины алдааг засав.

          2020 оны арваннэгдүгээр сарын 11-нд “Пфайзер” компанийн гүйцэтгэх захирал Альберт Бурла “Манай коронавирусийн эсрэг пфайзер вакцин туршилтдаа 90 хувийн эерэг үр дүн үзүүлсэн” талаараа зарлаж, нэг өдрийн дотор компанийнхаа 5.6 сая ам.долларын хувьцааг арилжсан юм. Харин “Medicago” болон “GlaxoSmithKline” компани хамтран үйлдвэрлэсэн коронавирусийн эсрэг вакцинаа туршилтын II, III шатны эмнэл зүйн туршилтад орж байгаагаа зарлаад байв. Гэсэн ч нэг өдөр вакцинаа “Үр дүнтэй байж магадгүй” хэмээн зарласан хоёр компани өнөөдрийн хэмжээнд нэг нь дампуурч, нэг нь ДЭМБ-ын зөвшөөрөл хүртсэн анхны коронавирусийн эсрэг вакцин болж, дэлхий даяар вакцинаа түгээж байна.

          Өнөөдрийн байдлаар дэлхийд коронавирусийн эсрэг нийт 24 вакциныг идэвхтэй хэрэглэж байгаагаас наймд нь ДЭМБ зөвшөөрөл олгосон. Үүнд пфайзер, астразенека, модерна, жонсон ба жонсон, ковишьелд, коваксин, вероселл, коронавак вакцин багтаж байгаа юм. Тэгвэл өчигдрийн байдлаар дэлхийд нийт хүн амын 40.4 хувь буюу 3.15 тэрбум хүн бүрэн тунд хамрагдсан байна.

-Коронавирусийн 40 орчим идэвхтэй мутаци байна-

          “Ковид-19” цар тахлын мутацид орсон анхны хувилбар жилийн өмнө Их Британид илэрсэн. Түүнээс хойш Өмнөд Африк, Бразил зэрэг улсад “Ковид-19” цар тахлын хувилбарууд бүртгэгдсэнээс хойш олон омгийн мутаци үүссэн.

          ДЭМБ-ын мэдээллээр өнгөрсөн сарын хэмжээнд дэлхийд нийт 40 орчим идэвхтэй коронавирусийн мутацид орсон хувилбар байгаа юм. Коронавирусийн хувилбарын талаар АНУ-ын Жон Хопкинсийн их сургуулийн профессор Роберт Боллинжер “Вирус доторх мутаци аажмаар хөдөлснөөр шинэ хувилбар бий болох нь тийм ч гайхмаар зүйл биш. Бүр томуугийн вирус хүртэл байнга өөрчлөгддөг тул эмч нар жил бүр өөр төрлийн шинэ томуугийн вакцин хийлгэхийг зөвлөдөг” хэмээн мэдэгдсэн юм.