Бүгд Найрамдах Австри Улсын парламентын сонгууль өчигдөр болж, Херберт Кикл тэргүүтэй Австрийн Эрх чөлөөний нам ялалт байгуулж, олонх болжээ. Тухайлбал, тус улсын Дотоод хэргийн яамны мэдээллээр Х.Киклийн нам сонгогчдын 29.2 хувийн санал авсан бол Австрийн Ардын нам 26.5 хувийн, Социал демократ нам 21 хувийн санал тус тус авч эхний гуравт багтсан байна. Улмаар Австрийн гурван том нам парламентад 58, 52, 41 суудалтай болж байгаа аж.

Австрийн эрх чөлөөний нам парламентад үнэмлэхүй олонх болоход олон суудал дутуу байгаагаас гадна Ардын намын дарга Карл Нехаммер сонгуулийн өмнө мэдэгдэхдээ, Киклтэй хамтран эвсэл байгуулах боломжгүй гэдгийг шууд хэлж байсан юм. Харин энэ удаагийн сонгуульд 6.3 сая австричууд оролцсон нь нийт сонгогчдын 74.9 хувь болж байна. Ням гарагийн орой сонгуулийн урьдчилсан дүнг зарлах үед 55 настай Х.Кикл “Манай нам шинэ эрин үеий үүд хаалгыг нээлээ” гэвсэн байна. Мөн парламентад суудалтай бүх намтай хамтран засгийн газар байгуулахад бэлэн гэдгээ илэрхийлжээ.

1956 онд байгуулагдсан Австрийн эрх чөлөөний нам өмнө нь гурван ч удаа Засгийн газрын бүрэлдэхүүнд орж байсан юм. Харин одоо “Европы эсрэг байр суурь” ба Украинд халдсан Оросыг буруушаахгүй байгаа зэргээс шалтгаалан Ардын нам, Ногоон нам хоёр Киклтэй эвсэхгүй гэдгээ мэдэгдээд байна.