АНУ-ын Конгрессын төлөөлөгчдийн тэнхимээс Дональд Трампыг хугацаанаас нь өмнө огцруулж, бүрэн эрхийг нь цуцлах ажлын хурлыг өнөөдөр эхэлж байна. Тэгвэл үүнтэй холбогдуулан Ардчилсан намаас төлөөлөгчдийн тэнхимийн шүүхийн хороонд өргөн барьсан санал бичигт “Дональд Трамп улс, эх орныхоо эсрэг ноцтой хэрэг үйлдсэн гэмт хэрэгтэн юм. Түүнийг нэг өдрийн өмнө ч болтугай Ерөнхийлөгчийн суудлаас буулгах хэрэгтэй” хэмээжээ.

       Тус санал бичигт Дональд Трампыг бослого гаргахад сонгогчдоо өдөөн турхирч, хүчээр засгийн эрхийг авахаар санаархсан талаар дурдсан байна. Ардчилсан намын уг саналыг хүлээж авсан АНУ-ын дэд ерөнхийлөгч Майк Пенс “Ерөнхийлөгчийн бүрэн эрхийн хугацаа дуусахад найм хүрэхгүй хоног үлдэж буй энэ цагт Ардчилсан намынхан Үндсэн хуулийн 25 дугаар нэмэлт өөрчлөлтийг хэрэгжүүлэхийг Засгийн газраас шаардаж байна. Энэ үйлдлийг улс, эх орны ашиг сонирхолд нийцэж, Үндсэн хуулийг баримталж байгаа гэдэг итгэлгүй байна” гэв.