ОХУ-ын Ерөнхийлөгчийн сонгуулийг ирэх гуравдугаар сарын 15-17-ны өдөр зохион байгуулах тов гарсан. Тодруулбал, Оросын сонгуулийн хорооны даргын саналын хуудсаар одоогийн Ерөнхийлөгч Владимир Путин болон парламентын дэд дарга Владислав Даванков, Леонид Слуцкий, Николай Харитонов нарын дөрвөн нэр дэвшигч өрсөлдөнө. Тэгвэл Ерөнхийлөгчийн сонгуульд В.Путины томоохон өрсөлдөгч байж болзошгүй гэж яригдаж байсан дайныг эсэргүүцэгч Борис Надеждиныг Кремлиэс хүлээн зөвшөөрөөгүй бөгөөд ОХУ-ын Ерөнхийлөгчийн сонгуульд оролцохыг нь хориглосон шийдвэр гаргажээ.

                     Түүнчлэн ОХУ-ын Ерөнхийлөгчийн сонгуулийн тов гарсан холбоотойгоор олон улсын анхаарал Москвад төвлөрсөн. Цаашлаад уг сонгууль ОХУ, Украины дайнд том нөлөө үзүүлэх талаар барууны тагнуулын алба мэдэгдээд байгаа бөгөөд Украины шахалттай нүүр тулж байгаа энэ үедээ төрийн тэргүүнээ сонгох амаргүй байхыг ч хэвлэлүүд онцлоод байгаа юм. Гэсэн ч ОХУ-ын Ерөнхийлөгчийн сонгуульд Владимир Путин дахин сонгогдох магадлал маш өндөр бөгөөд Их Пётрээс хойших хамгийн удаан хугацаанд төрийн эрх барьсан хүн болж ч болох аж.