ШШГЕГ-ын харьяа “Баривчлах байр” гэж бий. Тус байранд гэр бүлийн маргаан, согтууруулах ундаа  хэрэглэсэн үедээ авто тээврийн хэрэгсэл жолоодсон зэрэг Зөрчлийн хуулиар баривчлах арга хэмжээ авахуулсан хүмүүсийг саатуулдаг юм.

 Модель С.Эрдэнэцогтын найз бүсгүй Г.Ганчимэг сошиал хаягтаа найз залуудаа зодуулсан гэх нотлох баримтууд дэлгэж, шуугиан тарьж байсан цаг саяхан. С.Эрдэнэцогтыг гэр бүлийн маргааны улмаас Зөрчлийн хуулиар торгож, “Баривчлах байр”-нд 15 хоног саатуулсан билээ. Модель залуу баривчилгаанд явсан талаараа “UB Сomеdу” залуусын нэвтрүүлэгт оролцохдоо ярив. Тэрбээр “Би Зөрчлийн хуулиас болж хэд хоног хоригдсон. Би гэхдээ төлбөртэй өрөөнд байсан. Төлбөртэй өрөө гэж байдаг юм билээ. Төлбөртэй өрөөнд орсон тохиолдолд ариун цэврийн өрөө орох зэрэг асуудалгүй. Харин нийтийн өрөөнд байгаа тохиолдолд ариун цэврийн өрөө рүү цагаар ордог. Үүнээс болж нэг хүн өмдөндөө бие засаж байлаа. Тэгээд уурандаа гэртээ очоод, эхнэрээ хөнөөчихсөн” зэрэг зүйлийг ярьж, олны дургүйцлийг хүргээд байгаа юм.

Тэгвэл “Баривлах төв”-д төлбөртэй өрөө байдаг эсэхийг ШШГЕГ-ын Хэвлэл мэдээлэл, олон нийттэй харилцах төвийн дарга, хошууч Х.Баясгалангаас тодрууллаа. Тэрбээр “ШШГЕГ-ын харъяа хорих ангиудад төлбөртэй өрөө гэж байхгүй. Хуулиараа төлбөртэй өрөө байх боломжгүй. Хоригдол шүү дээ. Харин Зөрчлийн хуулиар 7-14 хоног “Баривчлах байр”-нд саатуулагдсан  иргэнд үйлчлэх төлбөртэй өрөө гэж байдаг. Иргэд өөрсдөө нийтийн дунд хоригдохгүй, ганцаараа байх сонирхолтой байвал зохих төлбөрийг нь төлөөд төлбөртэй өрөөнд байж болно. Иргэний хүсэлтийн дагуу ганцааранг нь байлгах өрөөг гаргаж өгөх боломжтой гэсэн үг” гэв.