“Оюутолгой” ХХК-д компанийн Өмнөговь аймгийн Ханбогд сумд байрлах уурхайн ажилтан амиа алдсан хэрэг гарсан байна. Энэ талаар тус компанийн хэвлэлийн ажилтнаас тодруулахад “Өчигдөр шөнө уурхайн ажилтан амиа алдсан хэрэг гарсан. Бид талийгаачийн ар гэртэй холбогдож, цагдаагийн байгууллагад мэдээлэл өгсөн. Цагдаагийн байгууллагаас шалгалтын ажиллагаа явуулж буй бөгөөд дэлгэрэнгүй мэдээлэл өгөх боломжгүй байна” гэв.

       Мөн Өмнөговь аймагт "Оюутолгой" ХХК-ийн уурхайн ойролцоо санаатайгаар хүний амь бүрэлгэсэн хэрэг гарчээ. Бид тус хэргийн талаар ЦЕГ-ын Хэвлэл, мэдээллийн төвийнхөнтэй холбогдож, асуухад “Өмнөговь аймгийн Цогтцэций сумын нутаг дэвсгэр, нүүрс тээврийн авто замд хоёрдугаар сарын 13-ны 01:00 цагийн орчимд нэг хүн хутгалуулж, нас барсан байдалтай олдсон мэдээлэл ирсэн. Цагдаагийн байгууллагын урьдчилсан шалгалтаар Хан-Уул дүүргийн харьяат 49 настай эрэгтэй А нь 49 настай эрэгтэй Н-ийг хутгалж, хөнөөсөн мэдээлэлтэй байна. Одоогоор Өмнөговь аймгийн Цогтцэций сумын Сум дундын цагдаа хэлтсээс шалгалтын ажиллагааг үргэлжүүлж байна. Дэлгэрэнгүй мэдээлэл өгөх боломжгүй” хэмээсэн юм.