Олон нийтийн цахим сүлжээнд бага насны хүүхдүүдийг элдэв ёс бусаар харааж, “халуун төмрөөр хайрч, түлнэ” гэх зэргээр айлгаж байгаа иргэний бичлэг нийтлэгдсэн. Тухайн иргэнийг олж, хүүхдүүдийг хамгаалалтад авсан эсэх талаар ЦЕГ-ын хэвлэл мэдээллийн мэргэжилтнээс тодрууллаа. Тэрбээр “Цагдаагийн байгууллагаас хүүхдүүдийг дарамталж, айлган сүрдүүлсэн иргэнийг өчигдөр бүртгэлд авч, шалгалтын ажиллагаа явуулж байгаа. Мөн хүүхдүүдийн аюулгүй байдлыг хангах чиглэлээр орон нутгийн хүүхэд хамгааллын байгууллагатай хамтран хамгаалалтад авсан. Эрсдлийн зэргийн үнэлгээг хийж, одоогоор шалгалтын ажиллагааг шуурхай явуулж байна” гэв.