Орхон аймгийн Баян-Өндөр суманд гал гарч, 60 настай эрэгтэй амиа алджээ. Тодруулбал, тус сумын Цагаанчулуут багийн тавдугаар гудамжинд “Байшин шатаж байна” гэсэн дуудлагыг хоёрдугаар сарын 2-ны 20:16 цагт аймгийн Онцгой байдлын газар хүлээн авчээ. Дуудлагын дагуу тус аймгийн Онцгой байдлын газрын Гал түймэр унтраах, аврах 81 дүгээр ангийн алба хаагчид 1.5 км замыг туулан очсон байна. Ингэхэд иргэн Г-ын 4х6 метрийн хэмжээтэй байшин шатаж, гал түймэрт иргэн 60 настай, эрэгтэй Г өртөж, нас барсан байжээ.