Алга болсон иргэнийг эсэн мэнд олжээ. Тодруулбал, Баян-Өлгий аймгийн Цэнгэл сумын Долоон гаталга багийн Хар-Уул гэдэг газраас 18 настай, эмэгтэй Э нь нэгдүгээр сарын 30-ны 21:00 цагт явган гараад ор сураггүй алга болсон байна. Энэ тухай дуудлагыг ар гэрийнхэн нь хоёрдугаар сарын 1-ний 16:10 цагт аймгийн Онцгой байдлын газарт ирүүлжээ.

Дуудлагын дагуу тус аймгийн Онцгой байдлын газрын Цэнгэл сум дахь Гал түймэр унтраах, аврах 71 дүгээр анги, сум дахь Цагдаагийн тасгийн алба хаагчид, ар гэрийнхний хамт Э-г эрэн хайх ажиллагааг зохион байгуулжээ. Алга болсон охиныг Цэнгэл сумын төвд оршин суух иргэн М-ийн гэрээс эсэн мэнд олсон байна.