Тээврийн цагдаагийн албанд өнгөрсөн гурван хоногийн хугацаанд зам тээврийн ослын шинжтэй 737 дуудлага бүртгэгджээ. Зам тээврийн ослын улмаас найман хүн гэмтэж, дөрвөн хүн амиа алдсан байна. Тодруулбал, нэгдүгээр сарын 13-ны 17:15 цагт Дорнод аймгийн Баяндун сумын Онгоцны даваа гэх газар “Toyota Prius” маркийн автомашин онхолдож, зорчигч Б гэмтэж, жолооч А нас баржээ.

Мөн өдрийн 22:20 цагт Баянхонгор аймгийн Богд суманд “Toyota Prius” маркийн автомашины жолооч Н нь явган зорчигч Б-г мөргөж, амийг нь хөнөөсөн аж. Түүнчлэн Сонгинохайрхан дүүргийн 22 дугаар хороо, 0151 цэргийн ангийн хойд замд “Toyota prius” маркийн автомашин “Hino  Ranger” маркийн автомашинтай мөргөлдөж жолооч, зорчигч нарын хоёр хүний амь хохирчээ.Цагдаагийн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон нийт 198 зөрчил илрүүлсний 100 нийслэлд, 98 нь орон нутагт бүртгэгдсэн байна.