Увс аймгийн Сагил сумын хил орчмын нутгаар энэ сарын 17-ны шөнө Тувагийн иргэд хил зөрчиж, орж иржээ. Тэднийг хилийн торон хаалт тасалж байхад нь хилчид үйлдэл дээр нь илрүүлж, 2-3 удаа анхааруулж, таслан зогсоох үйл ажиллагаа явуулсан байна. Ингэснээр Тувагийн нэг иргэн манай хилийн цэргийн алба хаагчдын бууны суманд өртөж, амиа алдсэн гэх мэдээлэл бий. Энэ талаар ХХЕГ-ын мэргэжилтнээс тодрууллаа.

    Тэрбээр “Манай хилийн цэргийн алба хаагч хил зөрчсөн Тувагийн нэг иргэнийг буудаж, хөнөөсөн нь үнэн. Хил зөрчигчид анхааруулгыг үл ойшоож, Сагил сумын нутаг руу зугтсан учраас хилчид тэднийг буудахад хүрсэн байна. Зугтсан хоёр иргэнийг эрэн сурвалжлах ажиллагаа явуулж, морьдынх нь мөрөөр мөшгөхөд өөр газраар дамжин Тувагийнхаа нутагт орсон байсан. Хил дээр хүний амь хохирсон учраас Увс аймаг дахь цагдаагийн газрынхан Сагил сумын нутагт мөрдөн шалгах ажиллагаа явуулж байгаа” гэв.

МОНГОЛ УЛСЫН ХИЛИЙН ТУХАЙ

   48.5 дугаар зүйл. "Улсын хил хамгаалах байгууллага, хилийн манаа хуульд заасан үндэслэл, журмын дагуу галт зэвсэг, тусгай хэрэгсэл, албаны нохой, биеийн хүч хэрэглэснээс үүссэн үр дагаврын төлөө хариуцлага хүлээхгүй."