Цаг уур, орчны шинжилгээний газраас энэ сарын 12, 13-нд говийн болон төвийн аймгуудийн нутгаар цас орж, цасан шуурга шуурахыг анхааруулсан. Улмаар өчигдөр буюу энэ сарын 12-нд Өмнөговь аймагт үүсээд буй цаг агаарын нөхцөл байдлаас үүдэн тус аймгийн төв болон сумаас гарах хөдөлгөөнийг өнөөдөр 09:00 цаг хүртэл хаасан. Тэгвэл цасан шуурганы улмаас малдаа явсан 68 настай иргэн сураггүй алга болсныг эрлийн баг эсэн мэнд олжээ.

Тодбруулбал, Цасан шуурганы улмаас Өмнөговь аймгийн Цогтцэций сумын нутагт оторлож явсан Ханхонгор сумын 68 настай малчин өчигдөр 13:00 цагт малдаа яваад сураггүй болсон. Түүнийг Гал унтраах 44 дүгээр ангийн дөрвөн алба хаагч нэг машинтай, Ханхонгор сумын ЗДТГ-ын 6 ажилтан хоёр машинтай, ар гэрийнх нь 10 хүн хамтдаа эрэн хайх ажиллагааг явуулж, 11 цагийн дараа сураггүй болсон малчинг эсэн мэнд олж, эмнэлгийн тусламж үзүүлсэн байна.

Түүнчлэн Номгон сумын нэг малчин, аймгийн төврүү явсан нэг машин сураггүй болсныг эсэн мэнд олсон байна.