Ард кино театрт байрлах “Circle K” салбар дэлгүүрийн угаалгын өрөөний хогийн савнаас өчигдөр дутуу төрсөн амьд нярай олджээ. Тодруулбал, тус газраар үйлчлүүлж, худалдан авалт хийсэн эмэгтэй дутуу төрсөн хүүхдээ цамцандаа боож, хогийн саванд хийсэн аж. Нярайн биеийн байдал хүнд байгаа бөгөөд ЭХЭМҮТ-ийн Сэхээн амьдруулах тасагт эмчлүүлж байгаа.

Энэ талаар ЦЕГ-ын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Б.Баатархүүгээс тодруулахад “Circle K” дэлгүүрээс өчигдөр 15.30 цагт нярай олдсон талаар дуудлага ирүүлсэн. Дуудлагын дагуу очиж ажиллан, хүүхдийг ЭХЭМҮТ-д яаралтай хүргэж өгсөн. Харин нярайн ээжийг өнөөдөр 14.00 цагийн үед олж тогтоосон. 22 настай эмэгтэй. Хүүхдээ хогийн саванд хийсэн гэдгээ хүлээн зөвшөөрсөн. Ямар шалтгааны улмаас орхисон болохыг хэлэх боломжгүй. Мэдүүлгийн явцад шалтгаан нөхцлөө мэдэгдсэн” гэв.