Төв аймгийн Лүн сумын I багийн малчин эхнэр, гурван настай хүүгээ зодож, амь насыг нь хөнөөхөөр заналхийлсэн хэрэг өнгөрсөн шөнө гарчээ. Эл хэргийн тухай нөхөртөө зодуулсан эхнэр, төрсөн аавдаа зэрэмдэглүүлсэн хүү хоёр гэрээсээ зугтаж, өнгөрсөн шөнийн 00:50 цагийн орчимд Лүнгийн чиглэлийн автозам дээр зогсож байхад нь олж,  цагдаагийн байгууллагад хүргэж өгсөн залуус цахим хуудастаа нийтэлсэн байна. 

Ergelt.mn сайт энэ хэргийн талаар Төв аймгийн Лүн сумын засаг даргаас тодруулахад “Тус айл хүү, охин хоёртой. Гэр бүл болоод найман жил болж байгаа. Өнгөрсөн хугацаанд тухайн гэр бүлээс Төв аймгийн Лүн сумын Засаг аргын Тамгын газар болон цагдаагийн хэлтэст нэг ч удаа гомдол, санал, дуудлага ирж байгаагүй” гэв.
Харин ЦЕГ-ын Хэвлэл мэдээллийн төвийн дарга, Цагдаагийн дэд хурандаа Б. Баатархүү эл хэргийн тухайд “Хүчирхийллийн гэмт хэргийн хохирогч болсон ээж, хүү хоёрын бие, сэтгэл санаанд ямар хохирол учирсныг тогтоож, дараагийн шатны тусламж үйлчилгээг авахаар эмнэлгийн байгууллагад үнэлгээ хийлгэхээр явж байна” гэлээ. 

Түүнчлэн гэр бүлийн хүчирхийллийн хохирогч эмэгтэйн хувьд “Нөхөр үүдэн шүднүүдийг минь хугалж, “Чамайг одоо дуусгана” хэмээн хутга барин араас хөөсөн” гэж мэдүүлжээ.