Залилангийн гэмт бүлэг байгуулж, 800 орчим БНХАУ-ын иргэнийг зочид буудлаадад байрлуулж байсан хятадуудад өнөөдөр 4-5 хорих ял оноожээ. Тодруулбал, Улаанбаатар хотын “Амар”, “Секрет гарден”, “Юнион бюлдинг”, “Санни таун”, “Кентавр”, “Ориентал" зочид буудалд 800 орчим БНХАУ-ын иргэнийг байрлуулж, гэмт бүлэглэл байгуулсан, элссэн зургаан хятад иргэнд хорих ял оноосон байна.

Хэргийг эргэн сануулбал, Цагдаагийн ерөнхий газар, Тагнуулын ерөнхий газар, Гадаадын иргэн харьяатын газар хамтран 2019 оны аравдугаар сарын 29-нөөс 30-нд шилжих шөнө Баянзүрх дүүрэгт байрлах "Амар”, “Ориентал", Баянгол дүүрэгт байрлах "Кентавр", Сүхбаатар дүүрэгт байрлах "Юнион", зэрэг дөрвөн зочид буудалд байрлаж байсан 500 гаруй БНХАУ-ын иргэнийг цагдаа, тагнуулын байгууллагаас саатуулах ажиллагааг зохион байгуулсан. 2019 оны аравдугаар сарын 30-ны өглөөний 07:00 цагийн байдлаар “Ориентал” төвийн гадна дээрх ажиллагаа үргэлжилж цагдаагийнхан хамгаалалт авсан юм. Тухайн үед дээр дурдсан зочид буудлуудад БНХАУ-ын иргэдийн ашиглаж байсан 1000 гаруй өндөр хүчин чадалтай комьпютер, 10 мянга гаруй гар утсыг хураан авч, баримтжуулсан.