Ражив Гандийн нэрэмжит Үйлдвэрлэл урлалын политехник коллежийн оюутнууд нэгийгээ цаасны хутгаар хутгалсан хэрэг гарчээ.

Тодруулбал, энэ сарын 22-нд буюу мягмар гарагт тус сургуулийн Авто машин засварын нэгдүгээр дамжааны оюутан 17 настай, эрэгтэй Б нь цаасны хутгаар гурван хүүхэд гэмтээсэн байна.

Тэрбээр тогоочийн хоёрдугаар ангийн дамжааны Х-г хэвлийн тус газарт нь цаасны хутгаар хутгалж, хүнд бэртээжээ. Харин Авто машин засварын нэгдүгээр дамжааны оюутан 15 настай Б тэднийг салгах гэж байгаад гарандаа зүсүүлсэн байна.

Улмаар судас таарч, оюутан Б нь яаралтай хагалгаанд оржээ. Мөн энэ үеэр хоёрдугаар дамжааны оюутан Т толгойдоо зүсүүлж, хөнгөн бэртэл авчээ.

Хэргийн талаар Ражив Гандийн нэрэмжит Үйлдвэрлэл урлалын политехник коллежийн нийгмийн ажилтан В.Гэрэлцэцэгээс тодруулахад “Энэ хэрэг мягмар гарагийн их завсарлагааны үе буюу 12:40 цагийн үед гарсан. Хүүхдүүд сургуулийн хойд талд зодолдож байна гэхээр нь яваад очтол хэрэг аль хэдийн болчихсон байсан.

Хэрэг юунаас болсон талаар хүүхдүүдээс тодруулахад “Авто машин засварын ангийн Б сургуулийн үүдэнд хоёр охин явж байхад нь бөгснөөс нь барих гэж оролдсон. Энэ үйлдлийг нь таслан зогсоохоор хоёрдугаар дамжааны Х,  Б-г ирээд алгадсан гэсэн.

Тэгээд нөгөө алгадуулсан хүүхэд хоёрдугаар дамжааныханд ингэж дээрэлхүүлэхгүй” гээд зодолдсон  байгаа юм. Тэгээд нэг хүүхдийг хэвлийн тус газарт нь цаасны хутгаар хутгалж, гэмтээсэн. Тухайн хүүхдийг манай сургуулийн эмч цаг алдалгүй боолт хийж, яаралтай түргэн тусламж дуудсан.

Манай сургуулийн оюутнууд өсвөр насныхан болохоор төлөвшиж амжаагүй байгаа хүүхдүүд. Мэргэжлийн онцлогоос шалтгаалж хүүхдүүд цаасны хутга, гааз ашиглах тохиолдол бий. Цагдаагийн байгууллагаас энэ хэргийг үйлдсэн хүүхдийг сургуульд явуулж байх шийдвэрийг гаргасан.

Хэрэг үйлдсэн Б нь одоо сургуульдаа явж байгаа. Энэ хүүхэд нь манай сургуульд сүүлд нэмэлтээр есдүгээр сарын 10-наас эхэлж суралцаж байгаа. Гэмтсэн хүүхдүүдийн эрүүл мэндэд зарцуулах зардлыг тухайн хүүхэд гаргасан” хэмээх тайлбарыг өгөв. 

Харин хэргийн талаар тус сургуулийн захирлаас тодруулах гэсэн боловч “Чухал хүмүүстэй уулзалттай байна” хэмээн мэдээлэл өгөхөөс татгалзав. 

Мөн гэмтсэн хүүхдүүдийн ангийн багш нар “Удирдлагаас зөвшөөрөл өгөөгүй” хэмээлээ. Харин хүүхдүүдийн хэлж буйгаар “Тухайн хүүхэд нь нэгдүгээр дамжаа болохоор сайн танихгүй. Охидуудыг бөгснөөс нь базах гэж оролдож байхыг нь харсан. Хүүхдүүд тэр үйлдлийг нь зогсоох гэж байгаад маргалдаж, цаасны хутгаар хутгалуулсан. Эхлээд зодолдож байгаад гэнэт цаасны хутга гаргаж ирээд хэвлий рүү нь дүрсэн юм шиг байна лээ. Тэрийг нь ангийн хоёр хүүхэд зогсоох гэж байгаад нэг нь гартаа, нөгөө нь толгойдоо хутгалуулсан” гэлээ.