Сэтгүүлч Г.Батхүү, зураглаач Д.Дөлгөөн нар зам тээврийн ослын улмаас өнгөрсөн оны зургадугаар сард амиа алдсан харамсалтай хэрэг гарсан. Осол болох үед жолоо барьж явсан зохиолч Б.Галсансүхийг Тээврийн прокурорын газрын хяналтын прокуророос яллах дүгнэлт үйлдсэн билээ. Түүнд холбогдох гэм буруугийн шүүх хуралдаан хэд хэдэн удаа товлогдсон ч хойшлоод байсан юм. Тэгвэл Б.Галсансүхэд холбогдох эрүүгийн хэргийг өчигдөр Хан-Уул дүүргийн Эрүүгийн хэргийн анхан шатны шүүх хянан хэлэлцжээ. Шүүхээс шүүгдэгч Б.Галсансүхийг гэм буруутайд тооцсон байна. Улмаар шүүгдэгч болон түүний өмгөөлөгч нараас хохирол төлөх ажлын тав хоногийн  завсарлага авах хүсэлт гаргасныг шүүх хүлээн авч, хоёрдугаар сарын 8-ны 11:00 цаг хүртэл завсарлалаа. 

Б.Галсансүхийг Замын хөдөлгөөний аюулгүй байдлын тухай хууль, Монгол Улсын Замын хөдөлгөөний дүрэмд заасан “Харанхуй үед болон үзэгдэлт хангалтгүй нөхцөлд жолооч өөрийн үзэгдэх хүрээн дотор тээврийн хэрэгслээ зогсоох боломжтой хурдыг сонгож явна” гэсэн заалтыг зөрчсөний улмаас онхолдож, зорчигч Г.Батхүү, Д.Дөлгөөн нарын амийг хохироосон гэж шүүхээс үзэж буй.