Өмнөговь аймагт хятад вакцин хийлгэсэн хүн ухаан алдаж, ярьж чадахгүй, таталт өгсөн гэх

   Манай улс коронавирусийн эсрэг “Синофарм”, “Астразенека”, “Спутник-V” вакциныг 1.7 сая гаруй хүнд тариад байна. Аливаа вакциныг тарихад хүний биед дархлааны тогтолцоо хариу урвал илэрдэг. Тухайлбал, халуурах, тарьсан хэсэгт хөндүүрлэх, толгой өвдөх, сульдах, бөөлжих, өндөр хэмтэй халуурах, ядрах зэрэг шинж тэмдэг илэрч болдог. Гэтэл коронавирусийн эсрэг вакцинд хамрагдсан иргэдэд дээрх шинж тэмдгээс гадна ухаан алдаж унах, гар, хөл бадайрах, даралт ихсэх, эмэгтэйчүүдийн хэвлийгээр өвдөх, доош цус гарах цаашлаад нас барахад хүрч байна. “Вакцинд хамрагдсан иргэдийн туслах газар” хэмээх цахим хуудаст иргэд вакцин хийлгэсний дараа өөрт мэдрэгдсэн хариу урвалын талаар сэтгэгдэл бичсэн байна. Зарим жишээг хүргэе. 

Вакцинд хамрагдсан иргэдэд зүрх нь дэлсэх, дотор муухайрах, хэвлийгээр өвдөх, бөөлжих шинж тэмдэгүүд түгээмэл илэрчээ

ТОХИОЛДОЛ-1: Миний даралт 150 хүрч, зүрх дэлсэх, чичрэх, дотор муухайрч, юм идэхээр хэвлийгээр өвдөж, толгой эргээд ес хонож байна.103 руу ярихаар “Эмнэлэгт ирэхээр коронавирусийн халдвар авах эрсдэлтэй байгаа” гэнэ. 119 руу залгаж асуухад “Тайван бай. Халуун, шингэн юм сайн уу. Өрхийн эмнэлэгтээ ханд гэсэн. Өрхийн эмч гэж залуухан хүү юу ч мэдэхгүй байж “Та тайван байж, ямар нэгэн аргаар гэртээ эмчил” гэсэн.

ТОХИОЛДОЛ-2: Хятад вакцин хоёр дахь тунгаа хийлгэсэн оройдоо дотор муухай оргиж, бие сульдаад, хоолой өвдөж, хий ханиалгаад, хоолны дуршилгүй болчихлоо.

ТОХИОЛДОЛ-3: Нуруу өвдсөнөө хэлэлгүй вакцин хийлгээд боссон чинь нүд харанхуйлж, толгой эргээд, баруун хөл дагаж татсан. Эмч даралт үзэхэд 180 хүрсэн байсан. Удаан хугацаанд хяналтын өрөөнд суусан.

ВАКЦИНД ХАМРАГДСАН ЭМЭГТЭЙЧҮҮДИЙН ДАВСАГ, БӨӨР НЬ ӨВДӨЖ, ДООШ ЦУС ГАРЧЭЭ

ТОХИОЛДОЛ-1: Хятад вакцины нэгдүгээр тунгаа хийлгэсний дараа хоёр дахь хоногоос доош бага зэрэг цус гараад байна. Вакцинаас хамаарч сөрөг нөлөө үзүүлж байна гэж ойлгосон.

ТОХИОЛДОЛ-2: Өнөөдөр 13:00 цагт хятад вакцин эхний тун хийлгээд 14:30 цагийн үед доошоо хар хүрэн өнгөтэй цус гарсан. Сарын тэмдэг биш. Одоо яах вэ.

ТОХИОЛДОЛ-3: Нуруу, бөөр, өндгөвч өвдөөд босож чадахгүй байна. Босохоор доош унжиж өвдөөд байх юм.

ТОХИОЛДОЛ-4: Хятад вакцины нэгдүгээр тун хийлгэсний орой хэвлийгээр өвдсөн. Одоо хоёр дахь хоногтоо өвдөж байна.

ВАКЦИНД ХАМРАГДААГҮЙ ИРГЭДИЙГ “АЖЛААС НЬ ХАЛНА” ХЭМЭЭН СҮРДҮҮЛСЭНЭЭС БОЛЖ, НАЙЗ МИНЬ ӨДӨРТӨӨ НАС БАРЧИХЛАА

ТОХИОЛДОЛ-1: Цэцэрлэгийн багш мэргэжилтэй найзыг минь “Вакцин хийлгэхгүй” гэхэд нь “Ажлаас чинь хална” хэмээн дарга нь сүрдүүлж вакцин хийлгэсэн. Гэтэл найз минь 30-хан насандаа Баянзүрх дүүргийн эмнэлэгт нас барчихлаа.

ТОХИОЛДОЛ-2: Увс аймгийн цагдаагийн алба хаагч вакцины хоёр дахь тунгаа өглөө 11:00 цагт хийлгээд орой 21:00 цагт нас барсан. Зүрх судасны архаг хууч өвчтэй боловч “Ажлаас нь хална” гэхээр аргагүй эрхэнд хийлгэсэн байна.

ТОХИОЛДОЛ-3: Миний аав гуравдугаар сарын 19-нд вакцин хийлгээд маргааш нь хорвоог орхисон. Шүүх шинжилгээнийхэн хариу гараагүй байгаа болохоор үхлийн шалтгааныг хэлэх боломжгүй байна гэсэн. Хариу гарахаар тэд “Чиний аав зүрхний архаг, хууч өвчтэй байж. Хохино” гэж хэлэх байх.

ТОХИОЛДОЛ-4: 10 жилийн ангийн найз минь “Астразенека” вакцины хоёр дахь тунг тариулаад гурав хоноод цус нь бүлэгнэж, зүрх нь хаагдаж нас барсан байна. Задлан шинжилгээний хариу тэгж харсан гэх юм.

    Ийнхүү иргэд коронавирусийн эсрэг вакцин хийлгээд өөрт тохиолдсон болон ойрын хүндээ илэрсэн шинж тэмдэг, учирсан таагүй явдлаа ийнхүү бичсэн байна. Энэ сарын 3-ны өдрөөс хөдөө, орон нутгийн иргэдийг вакцинжуулж эхэлсэн. Мөн орон нутгийн иргэдийн зүгээс таагүй мэдээ дуулдаж эхэллээ.

Тухайлбал, Увс аймагт вакцин хийлгэж байгаад ухаан алдаж унасан, Өмнөговь аймагт хятад вакцин хийлгэсэн хүн ухаан алдаж, ярьж чадахгүй, таталт өгсөн гэх. Тэд ХӨСҮТ, ЭМЯ-тай холбогдож зөвлөгөө, мэдээлэл авах гэсэн боловч “Тухайн газрынхаа Онцгой комисст ханд” гэжээ.