“10 настай охин байна уу”, “Нүцгэлсэн бичлэгээ явуулбал 15k өгье”, “Туранхай, 12 настай охин байна, санхүү авна” гэх мэт зар өсвөр насны хүүхдүүдийн хаалттай фэйсбүүк группт байж л байдаг зарын нэг болсон байна гэвэл та итгэх үү. Ингээд зогсохгүй дунд ангийн зарим сурагч төлбөртэй, хаалттай чат групп нээж, түүндээ бусадтай бэлгийн харилцаанд орж буй болон илүүлж, таалуулж буй эротик бичлэг, эмзэг эрхтэн, хөх, бөгсний зургаа илгээсэн хүүхдүүдийг элсүүлдэг явдал хэрээс хэтэрчээ. Өөрөөр хэлбэл, бага насны хүүхдүүдийн дунд садар самууныг сурталчилсан, цаашлаад мөнгө олох, бэлгийн гаж дуршлаа өдөөх, дарах хэрэгсэл болгосон хаалттай групп, чатууд цаг, минут тутамд нэмэгдсээр байна.  

 ХОХИРОГЧ 13 НАСТАЙ Э: Миний нүцгэн зураг, бичлэгийг авсныхаа дараа өөртэйгөө унтахыг шаардсанаас нь болж, би амиа хорлох төлөвлөгөө гаргаж байсан 

 ЦАХИМ ГЭМТ ХЭРЭГ ҮЙЛДЭГЧДЭД НОГДУУЛАХ ХУУЛИЙН ХАРИУЦЛАГЫГ ЧАНГАТГАХ ШААРДЛАГА ЗАЙЛШГҮЙ ТУЛГАРЧ БАЙНА  

     Бид энэ төрлийн гэмт хэрэгтэй манай улс хэрхэн тэмцдэг, гэмт этгээдэд хуулийн ямар хариуцлага ногдуулдаг талаар холбогдох мэргэжилтнүүдээс тодруулсан юм. НЦГ-ын мөрдөн байцаах хэлтсийн Гэр бүл, хүүхэд хүчирхийлэл, хүүхдийн эсрэг гэмт хэрэгтэй тэмцэх хэлтсийн ахлах мэргэжилтэн дэд хурандаа П.БОЛОРМАА “Өсвөр насны хүүхдүүд цахим орчинд хуурамч фэйсбүүк хаяг нээж, бусадтай танилцаж, улмаар гэмт хэргийн золиос болох тохиолдол өмнөх жилүүдийнхээс эрс нэмэгдэж байна. Энэ оны эхний арван сарын байдлаар 49 хүүхэд цахим гэмт хэргийн хохирогч болоод байна. Цахим гэмт хэрэг үйлдэгчдэд ногдуулах хуулийн хариуцлагыг чангатгах шаардлага зайлшгүй тулгарч байна” гэв. 

         Өдөр, шөнөгүй, нойр хоолгүй шахам мөнгөний төлөө зүтгэж, хүүхдүүдтэйгээ ярилцах ч завгүй ажиллаж, “Дулаан гэртээ, идэх хоолтой үлдээсэн дээ” хэмээн сэтгэл амар байх хойгуур чинь бэлгийн гаж донтой цахим гэмт хэрэгтнүүд алдрай бяцхан үрсийн чинь гэнэн итгэмтгий, сониуч занг ашиглан гэрт нь цахимаар дарамталж, гэмт хэргийн золиос болгон дарамталж байгаа юм биш биз...