Аравдугаар сарын 11-12-нд шилжих шөнө 10 хүн угаартсан тухай дуудлага, мэдээлэл цагдаагийн байгууллагад иржээ. 

Тодруулбал,

-“Баянзүрх дүүргийн 22 дугаар хороо Алтан-Өлгий хэсэгт хүн угаартсан байна” гэх дуудлага аравдугаар сарын 11-ний 06:52 цагт иржээ. Дуудлагын дагуу цагдаагийн алба хаагчид очиход тус тоотод оршин суух хоёр том хүн, нэг бага насны хүүхэд угаартсан байжээ. Эд мөрийн баримтаар угаар мэдрэгч, сайжруулсан түлш, үнснээс дээж авч, хэргийг Баянзүрх дүүргийн цагдаагийн нэгдүгээрт хэлтэст шалгаж байна. Угаартсан иргэд эмнэлэгт хордлого тайлах эмчилгээ хийлгэжээ.

-“Сүхбаатар дүүргийн 12 дугаар хорооны .. дугаар тоотод хүн угаартсан байна” гэх дуудлагын дагуу цагдаагийн алба хаагчид шалгахад есөн сартай А, дөрөв, зургаан настай, эмэгтэй О, С, 37 настай, эрэгтэй А, 29 настай, эмэгтэй О нар угаартсан байжээ. Эд мөрийн баримтаар 300 грамм үнс, таван ширхэг сайжруулсан түлш, найман кадр зураг хураан авчээ. Тус айл нь яндангийн хаалтаа бага зэрэг хааж, угаар мэдрэгчээ өөр газар тавьсан байсан гэнэ.

-“Сонгинохайрхан дүүргийн 42 дугаар хороо Хайрханы дугаар тоотод хүн угаартсан байна” гэх дуудлага аравдугаар сарын 12-ны 03:10 цагдаагийн байгууллагад иржээ. Дуудлагын дагуу алба хаагчид шалгахад тус тоотод оршин суух 34 настай, эмэгтэй Ш, 13 настай Ү нар угаартсан байжээ. Эд мөрийн баримтаар 10 кадр зураг авч, шалгалтын ажиллагааг үргэлжлүүлж байна.