ГЭМТ ХЭРЭГ

Улсын хэмжээнд Бүртгэгдсэн гэмт хэрэг 2020 оны эхний найман сард 18.0 мянга болж, өмнөх оны мөн үеэс 22.1%-р буурсан байна.16, түүнээс дээш насны 10 000 хүнд ногдох гэмт хэрэг 2020 оны эхний 8 сард улсын дунджаар 85 болж, өмнөх оны мөн үеэс 20.6%-р буурсан байна.

Нийт гэмт хэрэг өмнөх оны мөн үеэс буурахад өмчлөх эрхийн эсрэг гэмт хэрэг 3614 (25.9%), хулгайлах гэмт хэрэг 2002 (29.5%), хүний эрүүл мэндийн халдашгүй байдлын эсрэг гэмт хэрэг 649 (11.6%), залилах гэмт хэрэг 494 (13.2%), дээрэмдэх гэмт хэрэг 360 (51.4%), хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг 285 (30.5%), мал хулгайлах гэмт хэрэг 231 (20.7%), хүний бэлгийн эрх чөлөө, халдашгүй байдлын эсрэг гэмт хэрэг 162 (32.0%), хүний амьд явах эрхийн эсрэг гэмт хэрэг 160 (29.0%), гэр бүлийн хүчирхийлэл үйлдэх гэмт хэрэг 140 (65.1%), хөрөнгө завших гэмт хэрэг 114 (25.2%), хүчиндэх гэмт хэрэг 100 (26.0%)-гаар тус тус буурсан нь голлон нөлөөлжээ. Харин хүрээлэн байгаа орчны эсрэг гэмт хэрэг 181 (61.4%), цахим мэдээллийн аюулгүй байдлын эсрэг гэмт хэрэг 63 (3.0 дахин)-аар тус тус өссөн байна.

Гэмт хэргийн улмаас учирсан хохирол 2020 оны эхний 8 сард 108.7 тэрбум төгрөг, нөхөн төлүүлсэн хохирлын хэмжээ 37.7 тэрбум төгрөг болж, өмнөх оны мөн үеэс учирсан хохирол 34.0 (23.8%) тэрбум төгрөгөөр буурч,  нөхөн төлүүлсэн хохирол 7.7 (25.5%) тэрбум төгрөгөөр тус тус өссөн байна. Гэмт хэргийн улмаас 2020 оны эхний 8 сард 5.5 мянган хүн гэмтэж, 560 хүн нас барсан нь өмнөх оны мөн үеэс гэмтсэн хүн 389 (6.6%)-өөр, нас барсан хүн 170 (23.3%)-аар буурсан байна.

Гэмт хэргийн улмаас 2020 оны эхний 8 сард хохирсон 17790 хүний 104 (0.6%) нь 7 хүртэлх насных, 658 (3.7%) нь 8-17 насны хүүхдүүд байжээ.