Монгол Улсын Ерөнхийлөгчийн Тамгын газар (ЕТГ)-ын дэд дарга Б.Саруул ЕТГ-т ирсэн оффшор бүсийн асуудалтай холбоотой өргөдөл, гомдол зэрэгт нэгтгэн тайлбар өгснийг тоймлон хүргэж байна.

СҮ.БАТБОЛД, CHEONG CHOO YOUNG НАРТ ХАМААРАХ ОЛОН УЛСЫН ХУУЛИЙН МАРГААН ХЭРХЭН ЭХЭЛСЭН БЭ

2020 оны 10 сарын 28-ны өдөр.

         Баянзүрх дүүргийн иргэний хэргийн анхан шатны шүүхийн шүүгчийн захирамжаар анх уг маргаанд иргэний хэрэг үүсч байжээ. Энэ нь УИХ-ын гишүүн С.Батболд түүний гүйцэтгэгч Ч.Ганзориг, У.Туул, О.Нямдалай, Б.Баттүшиг нарын Монгол Улсын иргэд, мөн түүний гадаад улс дахь гүйцэтгэгч нар болох БНСУ-ын гурван иргэнд хамаарсан эрх зүйн маргаан юм.

“250 сая ам.доллар буюу 713,575,000,000 орчим тэрбум төгрөгийн онц их хэмжээний хохирол учруулсан гэж үзэн иргэний хэрэг үүсгэв”

         Монгол Улсаас гадна олон улсын зургаан улсад үүнтэй холбоотой хуулийн маргаан явагдаж байгаа талаар мэдээллийн эхэнд онцолсон бөгөөд С.Батболд, Cheong Choo Young, Kim Hak Seon нарын хариуцагчтай олон улсын шүүхийн зургаан маргаанд:

1.    Англи

2.    Хонконг

3.    Сингапур

4.    Жерси арал

5.    Британийн Виржинийн арлууд

6.    АНУ-ын Нью-Йорк мужийн шүүхийн маргаан багтаж байна. Эдгээр маргааныг тоймлон хүргэе.

“Олон улсын шүүхийн маргаанууд хэлэлцүүлгийн шатандаа явж байгаа бөгөөд С.Батболд, Cheong Choo Young, Kim Hak Seon нартай холбоотой нийт 13 үл хөдлөх хөрөнгө дор дурдагдаж, баримтаар нотлогдов.

Нийт үл хөдлөх хөрөнгийн үнэлгээ: 59.3 САЯ АМ.ДОЛЛАР БУЮУ 169.1 ТЭРБУМ ТӨГРӨГ”

БАРИМТ 1: Их Британи /Англи/

2020.11.18-ны өдөр. Шударга ёсны дээд шүүх дэх Англи, Уэльсийн арилжааны хэргийн шүүхийн хөрөнгө царцаах шийдвэр.

        Шүүхийн шийдвэрийн дагуу С.Батболд, Cheong Choo Young, Kim Hak Seon нар болон тэдний эзэмшлийн Лорш Лимитед оффшор бүсэд байгуулагдсан компанид бүртгэлтэй байдаг хоёр үл хөдлөх хөрөнгөтэй холбоотой шийдвэрээр 59.8 тэрбум төгрөгтэй тэнцэх хэмжээний аливаа хөрөнгийг бусдад үл хөдлөх хөрөнгийг бусдад шилжүүлэх, захиран зарцуулах зэргийг хязгаарласан байна.

       Нэг байранд нь С.Батболдын хүү Самаадий (Samaadi) Англид сурч байх хугацаандаа амьдран, ашигладаг байсан нь баримтаар ил болсон.

БАРИМТ 2: Хонконг

2020.11.23-ны өдөр. Хонконгийн дээд шүүхийн хөрөнгө царцаах шийдвэр.

        С.Батболд, Cheong Choo Young, Kim Hak Seon нарын хамаарал бүхий есөн оффшор компанитай холбоотой шүүхийн шийдвэр өнгөрсөн оны нэгдүгээр сарын 23-нд гарчээ.

        Хонконгийн дээд шүүхээс 85.5 тэрбум төгрөгтэй тэнцэх хэмжээний мөнгөн хөрөнгийг аливаа хэлбэрээр бусдад шилжүүлэх, захиран зарцуулах, эрхлэн удирдах эсвэл үнэлгээг бууруулахыг хязгаарласан шийдвэр гарчээ.

        Дээрх оффшор компаниудын эзэмшиж байгаа хоёр үл хөдлөх хөрөнгө тус маргаанд дурдагдсан байна. Эдгээр нь Хонконгийн төвд байрлах, тансаг зэрэглэлийн орон сууцнууд байв.

БАРИМТ 3: Сингапур

2020.12.27-ны өдөр

     Сингапур Улсын дээд шүүхээс нэг сая ам.доллартай тэнцэх хэмжээний аливаа хөрөнгийг бусдад шилжүүлэх, захиран зарцуулахыг хязгаарласан шийдвэрүүд гаргасан байна. Уг маргааны хариуцагчаар С.Батболд, Cheong Choo Young, Kim Hak Seon нар болон тэдгээрийн хамаарал бүхий аж ахуйн нэгжүүдийг багтааж байгаа юм.

БАРИМТ 4. Жерси арал

2020.11.24-ны өдөр. Жерсигийн дээд шүүхийн маргаан

      Жерсигийн дээд шүүхээс Cheong Choo Young, Kim Hak Seon нарын хамаарал бүхий “Bayar Limited”, “Cmerskiy Limited” гэсэн хоёр оффшор компанитай холбоотой шийдвэр гарчээ. Эдгээр компаниуд нь Тайландын Пукет аралд таван үл хөдлөх эзэмшдэг аж ахуйн нэгж бөгөөд хоёр үл хөдлөх хөрөнгийн тус бүрийн үнэлгээ нь тав сая ам.доллар байсан бол үлдсэн гурван үл хөдлөх хөрөнгийн тус бүрийн үнэлгээ нь 1.8 сая ам.доллартай дүйцсэн байна. Жерсийн арлын дээд шүүхээс эдгээр үл хөдлөх хөрөнгийг бусдад шилжүүлэх, захиран зарцуулах зэрэг бүх хөдөлгөөнийг хязгаарлажээ.

БАРИМТ 5: Британийн Виржинийн арлууд

2020.12.15-ны өдөр. Британийн Виржинийн арлуудын шүүхийн маргаан

         Британийн Виржинийн арлуудын дээд шүүхээс С.Батболд, Cheong Choo Young, Kim Hak Seon нартай холбоотой шүүхийн шийдвэр гарч, эдгээр компаниудын эзэмшиж байгаа аливаа үл хөдлөх хөрөнгө болон бусад хөрөнгийг эрхлэн удирдах, бусдад шилжүүлэх, үнэлгээг бууруулахыг хязгаарласан шийдвэр гарсан байна.

БАРИМТ 6: Нью-Йорк /АНУ/

2020.11.23-ны өдөр. АНУ-ын Нью-Йорк мужийн дээд шүүхийн маргаан

           Тус мужийн дээд шүүхээс одоогоор үл хөдлөх хөрөнгө царцаасан эсвэл удирдан зохион байгуулахтай холбоотой аливаа асуудлыг хязгаарласан шийдвэр гараагүй байна.