“Улаан чулуут” хогийн цэгт эмнэлгийн ЦУСТАЙ ХУРУУ ШИЛ, ЗҮҮ ТАРИУР, ШИНЖИЛГЭЭНИЙ ДЭЭЖ, АМНЫ ХААЛТНЫ ХОГОН ОВОО бий болж, нохой, шувуу шавж байна-II

Улмаар цар тахлын аюул заналхийлж байгаа энэ үед коронавирусийн эмчилгээ, оношлогоонд ашигласан ч байж болзошгүй, байгаль экологи, хүн амын эрүүл мэндэд аюултай уг их хэмжээний хог хаягдлыг “Элемент медикал” компани асгасан уу, эсвэл аль нэг эмнэлгийн байгууллага асгасан уу гэдгийг тогтоохоор Экологийн цагдаагийн алба, Мэргэжлийн хяналтын газрын хамтарсан баг “Элемент медикал” ХХК-ийн эмнэлгийн аюултай хог устгалын үйлдвэр, ландфиллын буюу булж устгах талбайд үзлэг, шалгалт хийж эхэлсэн юм. 

“ЭЛЕМЕНТ МЕДИКАЛ”КОМПАНИ УСНААС ХУУРАЙ ГАРАХ АРГА СҮВЭГЧИЛЖ ЭХЛЭВ ҮҮ

Түүнчлэн өчигдөр 16:00 цагийн орчимд “Элемент медикал”ХХК-ийн устгалын үйлдвэрт биднийг очиход хашаанд нь Экологийн цагдаагийн автомашин, үйлдвэрийн удирдлагуудын автомашин, ажилчдын автомашинуудаас гадна хоёр ширхэг “Ланд-200” маркийн автомашин байсан. Машинуудыг дугаарын бүртгэлээр нь судалж үзвэл Барилга хот байгуулалтын яам, Голомт банкны нэр дээр бүртгэлтэй, 2010, 2019 онд орж ирсэн автомашинууд байсан. Тухайн байгууллагуудын “жийп” унах эрх мэдэлтэй дарга нар эмнэлгийн аюултай хог устгадаг “Элемент медикал”-д ямар хэргээр зочлов, найз нөхөд, бизнесийн шугамаар зочилсон байлаа гэхэд цагдаа, мэргэжлийн хяналтын шалгалттай давхацсан нь жирийн нэг тохиодол уу, эсвэл “Элемент медикал” компанийг уснаас хуурай гаргахаар хууль хяналтынханд нөлөөлж байгаа юм биш биз гэх хардлагыг төрүүлж байгаа юм. 

МОНОПОЛЬ ЭРХТЭЙ “ЭЛЕМЕНТ” КОМПАНИ АЮУЛТАЙ ХОГ ХАЯГДЛЫГ ИЛ ЗАДГАЙ АСГАСАН АСУУДАЛД УДАА ДАРАА ХОЛБОГДОЖ БАЙЖЭЭ

Улсын бүртгэлд бүртгэгдсэнээр бол “Элемент” ХХК-ийг Зундуйн Баярсайхан, “Элемент медикал” ХХК-ийг Бандийн Пүрэвсүрэн гэх эмэгтэй эзэмшдэг. Түүнчлэн тэдний нэр дээр тус бүрдээ 3-4 компани бүртгэлтэй байгааг хэлэх нь зүйтэй. 

Одоо “Элемент” ХХК компани Налайх дүүргийн хогийн цэгт, тус компанийн охин компани буюу “Элемент медикал” ХХК “Улаан чулуут” хогийн цэгт эмнэлгийн хог хаягдлыг устгах үйл ажиллагаа явуулж буй. “Элемент” компани Улаанбаатар хотын хэмжээнд эрүүл мэндийн салбарын 1407 байгууллагын аюултай хог хаягдлыг тээвэрлэж, устгадаг. Тухайлбал, улсын 56 эмнэлэг, 358 эмийн сан, өрхийн 136, хувийн 773 эмнэлэг, эрүүл мэндийн 84 байгууллагатай гэрээтэй ажилладаг. “Элемент медикал” ХХК гэхэд дангаараа 900 орчим байгууллагатай гэрээтэй, хог хаягдлыг нь устгадаг. Тодруулбал, коронавирусийн эмчилгээ, оношлогоонд ашиглагдсан бүхий л аюултай хог хаягдлууд “Элемент” компанийн “гараар орж” байгаа гэсэн үг.

Эх сурвалжийн мэдээлснээр “Элемент” ХХК-ийг эзэмшигч З.Баярсайхан нь анх автомашины засвар, үйлчилгээний бизнес эрхэлдэг байсан гэх бөгөөд 2009 онд эмнэлгийн аюултай хог хаягдлыг тээвэрлэх, устгах тендерт шалгарснаар энэ төрлийн бизнест эргэлт буцалтгүй орсон нэгэн аж. Улмаар 10 орчим жил ямар ч “өрсөлдөгч”-гүйгээр энэ бизнесийг эрхэлж байгаа юм. 

Энэ хугацаандаа хэд хэдэн удаа эмнэлгийн аюултай хог хаягдлыг “Улаан чулуут” хогийн цэгт ил задгай асгасан хэрэгт холбогдож, торгуулаад өнгөрсөн байдаг. Тухайлбал, 2014 оны есдүгээр сард “Элемент” ХХК нийслэлийн эмнэлгүүдээс татан авсан их хэмжээний аюултай хог хаягдлаа ямар ч ариутгал, халдваргүйжүүлэлт, бутлалт хийхгүйгээр “Улаан чулуут” хогийн цэгт ил задгай асгасан байсан нь илэрч, олон нийтийг айдаст автуулж байсан. Улмаар сая 920 мянган төгрөгөөр торгуулсан болоод өнгөрч байсан юм. Түүнчлэн 2017 есдүгээр сард “Элемент” компанийн “Улаан чулуут” хогийн цэгт байрлах устгалын талбайд эмчилгээний зүү тариур, хуруу шил, эм, тарианы хайрцаг сав хөглөрч байгаа тухай иргэдийн гомдол мэдээллүүд ирж байсан ч тэгсгээд мартагдсан байдаг.

Гэтэл коронавирусийн халдвараар 900 гаруй хүн өвчилж, хэдэн мянган хүнийг “халдвар тээгч” байж болзошгүй хэмээн шинжилгээнд хамруулж, бүх нийтээр нь өндөржүүлсэн бэлэн байдлын зэрэгт шилжүүлээд байгаа энэ үед эмнэлгийн аюултай хог хаягдал, тэр тусмаа коронавирусийн эмчилгээ, оношлогоонд ашигласан байж болзошгүй хог хаягдлуудыг ил задгай асгасан ноцтой хэрэг мөн л “Элемент”ХХК-ийн салбар “Элемент медикал”ХХК-ийн устгалын талбайд гарлаа. Энэ зүгээр нэг давхцал уу. Эсвэл “Элемент” гэх монополь компани эмнэлгийн аюултай хог хаягдлыг тээвэрлэж  “Улаан чулуут”-д авчраад халваргүйжүүлэлт, бутлалт хийхгүйгээр шууд булж, түүнийгээ нуухаар оролдож байна уу. 

УЛСЫН, ХУВИЙН 1000 ГАРУЙ ЭМНЭЛЭГ “ЭЛЕМЕНТ”КОМПАНИД САРД ХЭДЭН ТӨГРӨГ ТУШААДАГ НЬ ТОДОРХОЙГҮЙ

ЭМНЭЛГИЙН АЮУЛТАЙ ХОГ, ХАЯГДАЛ ТЭЭВЭРЛЭХ, УСТГАХ БИЗНЕС ХУУЛИЙН ЯМАР ЗОХИЦУУЛАЛТТАЙ ВЭ

Түүнчлэн Хог хаягдлын тухай хуулийн 37 дугаар зүйлийн 6-д Зөвшөөрлийн хугацаа, нөхцөл, шаардлагыг зөрчсөн тохиолдолд мэргэжлийн хяналтын байгууллагын дүгнэлтийг үндэслэн зөвшөөрлийг гурван сар хүртэл хугацаагаар түдгэлзүүлж болно. Мөн хуулийн 37.8.4-т Зөвшөөрлийн нөхцөл, шаардлагыг удаа дараа буюу ноцтой зөрчсөн бол зөвшөөрлийг нь хүчингүй болгоно гэж заасан байдаг. 

ЭРҮҮЛ МЭНДИЙН САЙД Т.МӨНХСАЙХАН, БОАЖ-ЫН САЙД Д.САРАНГЭРЭЛ НАР “ЭМНЭЛГИЙН АЮУЛТАЙ ХОГ ХАЯГДАЛ”-ЫН АСУУДЛЫГ АНХААРАЛДАА АВНА УУ

Түүнчлэн коронавирусийн халдвартай нь батлагдсан 918 өвчтөний эмчилгээнд ашигласан зүү тариур, амны хаалт, эм бэлдмэлийн сав, цусны сорьцууд, тэдний ойрын болон дам хавьтлууд, тусгаарлалтад байгаа иргэдийн хэдэн арван сая ширхэг шинжилгээний дээж, халдварын голомтод ажиллаж байгаа 2500 орчим эмч, ажилтны халдвар хамгааллын хувцас хэрэглэл, нийслэлийн “Нэг өрх-Нэг иргэн” шинжилгээнд хамрагдсан 72 мянган иргэний сорьц энэ мэтээр хогийн цэг дээр ил хэвтэж байгаад салхинд хаа нэг тийш хийсэх, нохой, шувуу ямар нэг аюултай хаягдлыг зууж, нийслэлд, хүн амын дунд орхих, цаашлаад нохой, шувуу коронавирусийн халдвар тээгч болж, хүмүүст халдаах эрсдэл маш өндөр байгааг анхааралдаа авна уу, Эрүүл мэндийн сайд Т.Мөнхсайхан, Байгаль орчин, аялал жуулчлалын сайд Д.Сарангэрэл нар аа.