"ЮНИТЕЛ" ГРУППИЙН ИРГЭДЭЭС ИХ ХЭМЖЭЭНИЙ МӨНГӨ ЗАЛИЛСАН БАЙЖ БОЛЗОШГҮЙ ХЭРГИЙГ ШӨХТГ-ЫН МЭРГЭЖИЛТЭН Ш.БАТПҮРЭВ ХААЦАЙЛСАН ГЭВ ҮҮ

         Иргэдээс их хэмжээний мөнгө удаа дараа залилсан гэх хэрэгт “Юнител” группийн удирдлагуудыг болон ШӨХТГ-ын мэргэжилтэн Ш.Батпүрэвийг АТГ-аас шалгаж эхэлжээ. Тодруулбал, “Юнител”-ийн хэрэглэгчээс 2021 оноос эхлэн “Орчны чимээ” гэх үйлчилгээний төлбөр хэмээн өдөр бүр 50 төгрөг тооцож, сар бүрийн үндсэн төлбөр дээр нэмж авдаг гэх мэдээлэл манай сайтын редакцид ирсэн. Энэ талаар хохирогч юнителийн лавлахаас  тодруулахад “Та тус үйлчилгээг өөрөө сонгож, идэвхжүүлсэн байна” гэх тайлбар өгсөн байдаг.

      Тиймээс хохирогч дээрх асуудлыг Шударга өрсөлдөөн, хэрэглэгчийн төлөө газарт шалгуулахаар хандсан боловч тус газраас хохирогчийн өргөдөл, гомдлыг шалгахаар Ш.Батпүрэв гэх албан тушаалтныг томилсон байдаг. Тэрбээр хохирогчийн  гомдлыг шийдэж өгөхгүй буюу ямар нэгэн хариу өгөхгүй сар гаруй хугацаа өнгөрсөн гэдэг. Харин удаан хугацааны дараа нь юнителийн ажилтан хувийн гар утаснаасаа хохирогч руу залгаж “Бидний алдаа байсан байна. Таны хохирлыг барагдуулж өгье” хэмээн холбогдсон гэдгийг хохирогч онцолсон байдаг.  Хэдийгээр тухайн хохирогчийн  "Хохирлыг барагдуулж өгье" гэсэн боловч 1.3 сая хэрэглэгчтэй “Юнител” групп өөр хэчнээн хүнийг энэ мэт аргаар залилж, хохироосон байж болзошгүй хэмээн үзэж  хохирогч тус үйлдлийг шалгаж тогтоох нь зүй ёсны хэрэг хэмээн хуулийн байгууллагад ханджээ. Харин ШӨХТГ-ын мэргэжилтэн Ш.Батпүрэвийг шалгалтын үйл ажиллагааг хууль ёсны дагуу явуулдаг эсэхийг АТГ-аас шалгаж, тогтоох аж.

ШӨХТГ-ЫН МЭРГЭЖИЛТЭН: “ЮНИТЕЛ” ГРУППЭЭС ИРГЭНИЙ ГОМДЛЫГ ШИЙДВЭРЛЭЖ, СЭТГЭЛ ХАНАМЖИЙГ НЬ НЭМЭГДҮҮЛЭХЭЭР 19500 ТӨГРӨГИЙН НЭГЖ ОЛГОСОН” ГЭСЭН ТУЛ МАНАЙХ ГОМДЛЫГ НЬ ХААСАН

      "Юнител" группэд гомдолтой байгаа дээрх иргэний асуудлыг хэрхэн шийдвэрлэж өгсөн талаар Шударга өрсөлдөөн, хэрэглэгчийн төлөө газрын Олон нийт хамтын ажиллагааны газрын даргаас тодрууллаа. Тэрбээр "Манайх иргэдийн гомдол, мэдээллийг 30 хоногийн дотор шийдэж өгөх хуулийн хугацаатай. Тус иргэн арваннэгдүгээр сарын 3-нд манайд гомдол гаргасан. Гэхдээ “Орчны чимээ”  гэх үйлчилгээний төлбөр авсан гэх асуудлаар гомдол гаргаагүй. Харин “Юнител рүү залгахад болон зурвас илгээхэд 500 төгрөгийн нэгж унаад байна. Үүнийг шалгаж өгөөч” гэх гомдол ирүүлсэн. Манайх үүрэн холбооны операторуудад иргэдээс ирүүлсэн санал, гомдлыг мэйл хаягаар шилжүүлж, иргэдийн асуудлыг шийдэж өгдөг. Тус иргэний гомдол арваннэгдүгээр сарын 10-нд юнител группэд очиж, 15-нд юнителээс хариу ирсэн. Ингэхдээ юнител группийнхэн “Хэрэглэгчийн дугаарын дуудлага хадгалах үйлчилгээ болон “Орчны чимээ” гэх үйлчилгээ идэвхтэй байсан байна. Тиймээс нэмэлт үйлчилгээний төлбөр нэгжээс хасагдсан байгааг тухайн иргэнд тайлбарлан өгч, үйлчилгээг нь цуцалж, сэтгэл ханамжийг нь нэмэгдүүлэх үүднээс 19500 төгрөгийн нэгж олгосон” гэх хариу ирүүлсэн байсан. Тиймээс тус иргэний асуудал шийдэгдсэн хэмээн үзэж, манайх гомдлыг нь хаасан” гэв.