“Сод монгол групп”-ийн удирдлага, холбогдох албан тушаалтнууд луйвар хийж, бусдыг хууран мэхэлж, өөрсдөө давуу байдал олгосон ноцтой баримт манай сайтад ирлээ. Саяхандаа, “Эрдэнэт үйлдвэр” ТӨҮГ-аас зарласан тендерт УИХ-ын гишүүн Ц.Анандбазарын “Сод монгол групп” ХХК хуурамч бичиг баримт үйлдэж, ялсан байж болзошгүй гэх шуугиан тарьсан. Тэгвэл уг хууль бус үйлдэл үнэн болохыг батлах баримтыг уншигч танд хүргэх гэж байна.

       Өнгөрөгч дөрөвдүгээр сард “Эрдэнэт үйлдвэр” ТӨҮГ-аас “Зуны дизель түлш” авах 38.8 тэрбум төгрөгийн тендер зарласан байдаг. Уг тендерт УИХ-ын гишүүн Ц.Анандбазарын “Сод Монгол групп” ХХК шалгарсан баримт системд бүртгэгдсэн байлаа. Тодруулбал, ЭҮТӨҮГ/202201171/01/01 дугаартай зарласан тендерт НИК, Шунхлайпетролиум, Сод монгол групп оролцож, тендерт “Сод монгол групп” ялсан байв. Харин НИК, Шунхлайпетролиумын хувьд ТБОНӨБАҮХАТ хуулийн 27.4 дэх заалтаар буюу шаардлагад нийцсэн тендер ирүүлээгүй учир хасагдсан байна. Нээлттэй зарласан тендерт тус группийн ирүүлсэн тендер шаардлага хангасан буюу сайн үнэлгээ авч, шалгарсныг Төрийн худалдан авах ажиллагааны цахим системд бүртгэсэн байсан юм. Хэн ч харсан тус группийг хамгийн сайнаар үнэлэгдэж, шалгарчээ гэж итгэхээр бүртгэжээ.   

         Харин уг тендерийг хууль бус гэдгийг зарим хүн өнгөрсөн дөрөвдүгээр сарын сүүлчээр мэдэгдэж, хуурамч бичиг баримт үйлдэж, 38.4 тэрбумын зуны түлшийг шууд нийлүүлэх боломжийг өөрсдөө олгосон байж болзошгүй хоёр баримтыг дэлгэсэн юм. Өөрөөр хэлбэл, УИХ-ын гишүүн Ц.Анандбазарын “Сод Монгол групп” ХХК-ийнхан хуурамч бичиг баримт бүрдүүлж, зуны түлшний тендерт ялсан байж болзошгүй гэх.

Мөн  нефть импортлогч компаниуд “Эрдэнэт үйлдвэр”-ээс зарласан түлшний тендерт “Содмонгол групп” хуурамч баримт бичиг бүрдүүлж өгсөн хэмээн Сангийн яаманд гомдол хүргүүлж, хандаад байгаа билээ.

      Харин энэ талаар Сангийн сайд Б.Жавхлангаас сэтгүүлчид тодруулахад “Би өглөө 08.00 цагаас Засгийн газрын хуралдаанд орсон. Яаман дээр ямар бичиг ирсэн талаар мэдээлэлгүй байна. Өчигдөр сошиал дээр ийм мэдээлэл гарсан байсан. Тиймээс бичиг хэрэг дээрээс албан ёсоор асууж шалгасан. Одоогоор тийм бичиг ирээгүй байна” гэсэн хариулт өгсөн байдаг. Одоогийн байдлаар уг асуудал Сангийн яаман дээр ч мөн шалгагдаж байна.

        Харин “Роснефть”-ийн албан ёсны мэдээлэл, “Содмонгол групп”-ийн тендерт бүрдүүлсэн баримтаас зөрсөнөөр энэ хэргийн сэжүүр олджээ. “Эрдэнэт үйлдвэр”-ээс дотоод хяналт шалгалт явуулж, уг асуудлаар хууль хяналтын байгууллагад хандаад байгаа гэнэ. Тодруулбал, ОХУ-аас нийлүүлэх дизель түлшний хүхрийн агууламж үйлдвэрийн албан ёсны сайт дээр өндөр байсан ч “Эрдэнэт үйлдвэр”-т өгч тендерт шалгарсан материалд хүхрийн агууламжийг бууруулж бичсэн нь анхаарал татаж Photoshop программаар зассан байх магадлалтай гэж хардахад хүргэсэн юм. Тэгвэл тэд үнэхээр Photoshop программаар засаж, хуурамч бичиг баримт бүрдүүлж, өндөр дүнтэй тендерт ялжээ.

Тус компанийнхан баримтыг өөрчилж, 2022 оны дөрөвдүгээр сарын 6-ны өдөр нийслэлийн Сүхбаатар дүүргийн нотариатаар батлуулсан байжээ. Ингэхдээ долдугаар бичгийг өөрчилж, зассан байжээ. 

ТАЙЛБАР: СОД МОНГОЛ ГРУПП ДОЛДУГААР БАРИМТЫГ ӨӨРЧИЛЖ, ЗАСЖЭЭ