-Хар машиныг хакердах, хакердахгүй тухай асуудалд биш, төрийн эрхийг хууль бусаар авахыг санаархсан хоёр нэр дэвшигчийн нэрийг эхлээд тат, хууль хяналтынхаан-

Үе үеийн удирдагчдын хамаг булхай илэрчих гээд өчигдөр мөн ч халуухан өдөр байлаа. “Сонгуулийн санал тоолох төхөөрөмжийг хакердах боломжтой”, бүр “Захиалгаа өгвөл дор нь хакердаад өгье” гэсэн гэх мэдээлэл хэвлэлээр хөврөхтэй зэрэгцэн Монголын хууль, хүчний бараг бүх байгууллагаас яаран сандран “Санал тоолох төхөөрөмжийг баргийн бацаан хакердахгүй, тийм боломж байхгүй” хэмээн мэдээлэл хийлээ. Хэл ам гарах бүрт бөөн бөөнөөрөө барьц алдан “Баргийн хүүхэд хакердахгүй” гэж сандралдахад хүргэдэг хар машин үнэхээр баталгаатай эсэх нь чухал ч, үүнээс бүр илүү чухал, үндэсний аюулгүй байдалд заналхийлсэн үйлдэл  нь баримттайгаа, эзэдтэйгээ олон нийтэд ил болоод байна.

Өөрөөр хэлбэл, МАН-аас ИТХ-д Баянгол дүүргээс нэр дэвшигч нэр бүхий хоёр эмэгтэй санал тоолох төхөөрөмжид зориудаар, хууль бусаар нэвтэрч, ИТХ-д сонгогдох захиалга бусдад өгөхийг санаархсан байж болзошгүй тохиолдол олон нийтийн сүлжээгээр цацагдлаа. Үүнээс илүү баримт, үүнээс илүү ямар нотолгоо хэрэгтэй гэж. Гэвч хууль хяналтынхан “Тэр бичлэг үнэн эсэхийг шалгаж байгаа” хэмээн тайвнаар тайлбарлаж байгаа нь олон нийтэд МАН-ын хоёр нэр дэвшигчийн Монгол төрийн эрхийг хууль бусаар авахыг санаархсан санаархлыг хуулийнхан хаацайлж, бүр ач холбогдолгүй асуудал мэт нийтэд ойлгуулахыг оролдож байж мэдэхээр байна гэх хардлагыг төрүүлээд байна. МАН-ын удирдлагуудын зүгээс ч хар машины хуудуутай дүн, хакердуулдаг, хакердуулдаггүйтэй хольж, хутгасан мэдээллийг зай завсаргүй бөмбөгдөх аргаар өнөөх хоёрын “...Тооллогын машиныг үнэхээр хакердаж болно гэж үү, Билл нь яах вэ гарчихдаг юм байж, хуудсаа яаж бөглөх вэ...” гэх зэрэг захиалгыг бүдгэрүүлэх ажиллагааг нэгэнт эхлүүлсэн бололтой. Тэд ингэхгүй бол хэдэн сонгууль дамжин хийсэн байж  болзошгүй булхай луйвар, “хакер” нь илэрч, өөрсдөө баларна. Намаараа, Засгийн газраараа, бүтцээрээ ахин сэхэхгүй болтлоо арчуулна. Ингэхгүйн тулд Г.Гангамөрөн, Б.Сэвжидмаа нарын хэргийг ямар ч хамаагүй аргаар, хэчнээн ч хэмжээний хөрөнгөөр дарахад МАН-ынхан бэлэн суугаа нь тодорхой.

Санал тоолох төхөөрөмжийг хакердах ч яах вэ хакерддаг л юм байгаа биз. Харин төрийн эрхийг хууль бусаар авахыг завдсан хэн ч эрүүгийн хариуцлага хүлээдгийг монголчууд хамгийн ойрдоо 60 тэрбумын гэх хэргээс харсан билээ. Алдарт 60 тэрбумын гэх хэргээс Г.Гангамөрөн, Б.Сэвжидмаа нарын хийсэн үйлдэл огт ялгаагүй бөгөөд одоо хууль, хяналтынхан хэрхэн ажиллахыг, адаглаад өнөөдөр тэдний нэрийг ИТХ-д нэр дэвшихээс татах эсэхийг, цаашид юу өрнөхийг харж, хүлээхээс өөр сонголт бидэнд үгүй.