Д.Мөнхбат өнгөрсөн аравдугаар сард БНСУ-аас эх орондоо ирж, “Энхсаран” сувилалд 22 хоног тусгаарлагдаж, 23 дахь хоног дээрээ халдвар илэрсэн талаараа тухайн үед мэдэгдэж байсан. Тэрбээр “Энхсаран” сувилал халдварын голомт болж, халуун усны газраас нь иргэдэд халдвар тархсан гэж үзэж байгаа хэмээн ярьсан юм. Түүнийг ингэж мэдээлсний дараа “Олон нийтэд коронавирустэй холбоотой худал мэдээлэл түгээсэн” хэмээн Зөрчлийн хуулиар торгосон билээ. Тэгвэл түүнд мөн Эрүүгийн хэрэг үүсгэж, яллагдагчаар татжээ. Энэ талаар Д.Мөнхбатаас тодрууллаа.

-Таны бие давгүй юу. Халдвар аваад эдгэрсний дараа сөрөг нөлөө үлдсэн үү?

-Халдвар аваад сар гаруйн хугацаанд эмчлүүлж, эдгэрээд гарсан. Коронавирусээр өвчилсөнтэй холбоотойгоор жижигхэн мэс засалд орох байсан ч чадаагүй. Одоо амтлах, үнэрлэх мэдрэмж бүрэн сэргээгүй байгаа. Мөн байнга ядарч, сульддаг болсон. Бусдаар ч давгүй байна. 

-Зөрчлийн хуулиар торгуулсан шүү дээ. Хэрэг нь хаагдаагүй юм уу?

-Хоёр хэргээр шалгагдаж байгаа. Эхнийх нь үзэл бодлоо илэрхийлж, бусдад худал мэдээлэл түгээж, ард иргэдийг төөрөгдүүлсэн гэж Зөрчлийн тухай хуулийн 5.13.1 дэх заалтаар торгох шийтгэл ногдуулсан. 

-Танд ямар үндэслэлээр Эрүүгийн хэрэг үүсгэсэн юм бэ?

-Хан-Уул дүүргийн Прокурорын газраас 2021 оны гуравдугаар сарын 24-ний өдөр Эрүүгийн хуулийн 15.6.1 дэх хэсэг “Бусдын амь насанд аюул учруулж болзошгүй халдварт өвчин бусдад халдаах, эсхүл тархах нөхцөл бүрдүүлсэн” гэх зүйл ангиар Эрүүгийн хэрэг үүсгэж, яллагдагчаар татаад байна. Хариуцлагагүй шийдвэрийн улмаас иргэдийн амь нас, эрүүл мэнд хохирч болох байсан эрсдэлт нөхцөл байдлаас сэргийлэх зорилгоор шударга шүүмжлэл өрнүүлсэн миний мэдээллүүд иргэдийг төөрөгдүүлсэн, өдөөн турхирсан хэв шинжтэй гэж үзсэн юм билээ.