Говь-Алтай аймгийн Алтай сумын Хилийн цэргийн 0214 дүгээр ангийн Баянтоорой заставын хугацаат цэргийн алба хаагчид дөрөвдүгээр сарын 8-ны 18:00 цагийн үед харуулын даргаа хөнөөгөөд зугтсан хэрэг гарсан. Байлдагч Х, М нар харуулын манаанд явж ирээд, харуулын дарга Г-ийн цээжин тус газарт гурван удаа буудаж, амийг нь хөнөөсөн гэдэг. Зэвсэглэсэн хоёр байлдагчийг дөрөвдүгээр сарын 11-ний 10:20 цагийн үед  Алтай сумын нутаг Зөөлөн богд уулнаас ар гэрийнхнийх нь тусламжтайгаар баривчилсан талаар бид мэдээлсэн билээ.

Байлдагчид нарыг Говь-Алтай аймгийн Шүүхийн шийдвэр гүйцэтгэх албаны Цагдан хорих байранд цагдан хориод байгаа юм. Харуулын даргаа хөнөөсөн байлдагч нар одоогийн байдлаар мэдүүлэг өгөөгүй гэдгийг ар гэрийнхэн нь мэдээллээ. Тэд хэлэхдээ “Энэ хэрэг Говь-Алтай аймгийн нутаг дэвсгэрт болсон учраас хэргийг тэнд нь шалгах юм билээ. Одоогоор дүү маань мэдүүлэг өгөөгүй байгаа. Анх цагдаагаас “Өмгөөлөгчтэй мэдүүлэг өгөх үү” гэж асуухаар нь “тийм” гэж хариулсан. Бид Говь-Алтай аймгаас өмгөөлөгч авсан байгаа.  Мөн Улаанбаатар хотоос нэг өмгөөлөгч хамтарч ажиллах юм билээ. Өмгөөлөгч өчигдөр хэлэхдээ “Удахгүй мэдүүлэг өгнө” гэж хэлсэн. Мэдүүлэг өгсөн даруйдаа бидэнд мэдэгдэнэ. Миний дүү Х-тэй явсан байлдагч М-ийн ар гэрийнхэнтэй бид холбоо тогтоож чадаагүй. Байлдагч М ээжтэйгээ хамт амьдардаг гэсэн” хэмээлээ.