2020 оны тавдугаар сард Э.Буянхишиг бага хүүгийнхээ төрсөн өдрийг тэмдэглээд эрүүл саруул дөрвөн хүүхэдтэйгээ инээлдээд сууж байлаа. Гэтэл өнөөдөр тэрбээр хүн харахад ч нүд халтирам болж, өвчиндөө шаналан тарчилж байна.  Шуудхан хэлэхэд “Тэнүүн-Огоо” гэх хуулийн дээр гишгэлж, өрөвдөх, хайрлах, энэрэх сэтгэлгүй компанийн удирдлагуудын буруутай үйлдлээс болж ийм байдалтай болчихоод байгаа юм. Хөөрхий эмэгтэй олон сараар үхэлтэй тэмцэж, эрүүл саруул болох гэж тэсвэрлэхийн аргагүй зовиурлах өвчнөө шүд зуун тэсч байна. Дөрвөн хүүхдээ өнчрүүлэхгүйн тулд л зовлон бүрийг давж туулж байна лээ.

Гэвч Монголын хууль хяналтын байгууллагын хүнд суртал, хууль зөрчсөн үйлдэл түүнийг туйлдуулж байна. Хатуухан хэлэхэд, үхэл рүү нь түлхэж байна. 

Түүний ийм болсон нь техникийн бүрэн бүтэн байдлаа хангаагүй, ажилдаа хариуцлагагүй хандсан хүмүүсийн буруутай үйлдлээс болсон гэдэг нь баримтаар нотлогддог. Тодруулбал, өнгөрсөн оны зургадугаар сарын 8-нд Чингэлтэй дүүргийн XIX  хороо Шадивлангийн эцэст зам тээврийн ноцтой осол гарч, Тэнүүн-Огоо компанийн автобус осолдсон юм. Тухайн үед жолооч оройн ээлжээсээ бууж явсан бөгөөд автобусны тоормос гэнэт ажиллагаагүй болж, газрын уруу руу өнхөрсөөр айлын хашаа мөргөсөн байдаг. Азаар хүний амь эрсдээгүй ч жолооч нь маш хүнд гэмтэж, олон сар ухаангүй эмнэлэгт хэвтсэн билээ. Осол гарахаас өмнө жолооч Э.Буянхишиг “Автобусны тоормос ажиллахгүй байна. Янзлуулмаар байна” гэдэг хүсэлтэй удаа дараа тавьсан ч засварын инженерүүд засахаас цааргалж, ажилд нь хөөж гаргаснаар осол гарах шалтгаан бүрджээ. Тухайн үед Э.Буянхишиг жирэмсний амралтаа дуусгаад ажилдаа ороод гуравхан сар болж байсан юм.

Ослын дараа түүний биеийн байдал маш хүнд байсан бөгөөд хэд хэдэн удаа хагалгаанд орсон боловч амжилттай болсон нь ховор. Одоо тэрбээр амаараа хоол, цай идэх боломжгүй, гэдсэндээ гуурстай, амьсгалахад ч хүнд байдалтай байгаа юм. Өнгөрсөн арванхоёрдугаар сард хоолойдоо стек тавиулах  хагалгаанд орсноор өнөөдөр амьсгалын аппаратаасаа салж, гэртээ ирээд байгаа нь энэ. Одоо гаднын орон руу явж эмчилгээ хийлгэхээс өөр арга байхгүйг эмч нар зөвлөж буй. Гэвч эмчилгээний зардал хэт өндөр, өнгөрсөн хугацаанд олон сар эмнэлгээр явсан тэдэнд санхүүгийн хүндрэл үүсээд байгаа гэнэ.

Ийн хэргийн үнэн мөнийг тогтоож, гэм буруутай этгээдэд нь хариуцлага хүлээлгэхэд хойрго хандаж байна уу гэлтэй. Мөрдөн байцаах ажил жил орчим үргэлжилж байгаа ч “Шалгаж дуусаагүй” гэдгээс өөр хариу сонсож чадахгүй тэдэнд “Дээшээ тэнгэр хол доошоо газар хатуу” болжээ. Техникийн бүрэн бүтэн байдлаа хангаж чаддаггүй автобуснууд нь удаа дараа  осол гаргадаг, ажилтнууд нь эрүүл мэнд, амь насаараа хохироод хөсөр хаягддаг Тэнүүн-Огоо компанийнханд хэн хариуцлага тооцох вэ.