Баянзүрх дүүргийн  26 дугаар хорооны нутаг дэвсгэрт энэ сарын 17-ны өдрийн 06:00 цагаас гуравдугаар сарын 21-ний 23:00 цаг хүртэл хатуу хөл хорио тогтоогоод байсан билээ. Хөл хорио тогтоосон өдрөөс эхлэн тус хорооны оршин суугчид эсэргүүцэж, жагсаал зохион байгуулснаар хөл хориог хоёр хоногийн дараа цуцласан юм.Тэгвэл хатуу хөл хорионы хугацаанд Баянзүрх дүүргийн Засаг дарга Н.Баярмөнх болон тус дүүргийн Онцгой комиссын шуурхай штабын дарга И.Жаргалсайхан нар төрсөн өдөр тэмдэглэх гэж буй охинд зөвшөөрөл олгож, хорооны нутаг дэвсгэрээс гаргасан талаарх мэдээлэл цацагдаад байгаа юм.

Энэ талаар Баянзүрх Онцгой комиссын шуурхай штабын дарга Т.Жаргалсайханаас тодрууллаа. Тэрбээр “26 дугаар хороонд тогтоосон хатуу хөл хорионы үеэр 1200 гаруй хүнд зөвшөөрөл олгож, гаргасан. Ингэхдээ эрүүл мэндийн шалтгаантай, гадаад улс руу зорчих тийзтэй, буяны ажилд оролцох зэрэг хүндэтгэн үзэх дөрвөн шалтгаантай иргэдээс шинжилгээ авч, хорооны нутаг дэвсгэрээс гарах зөвшөөрөл олгосон юм. Олон нийтийн сүлжээнд “Төрсөн өдөр тэмдэглэх гэж буй хүнд зөвшөөрөл өгсөн” хэмээх мэдээлэл цацагдсан байна лээ. Энэ асуудлыг цагдаагийн байгууллагаас шалгаж, хуурамч мэдээлэл гэдгийг нь тогтоосон. Олон нийтийн сүлжээнд хорооны нутаг дэвсгэрээс гарах зөвшөөрлийн бичгийн зураг оруулж, “Гарчихсан шүү найзуудаа” гэж бичсэн иргэн нь эрүүл мэндийн шалтгаантай хүний зөвшөөрлийн бичгийг ашигласан байна лээ. Бусдын зөвшөөрлийн бичгийн ашиглаж, худал мэдээлэл түгээсэн иргэнийг цагдаагийн байгууллагаас 500 мянган төгрөгөөр торгосон” гэх мэдээллийг өглөө.