Эрхэлсэн тодорхой ажилгүй М, О, Н нар нь хохирогч Э-г зодож, хүчээр биеийг нь үнэлүүлдэг байсан байж болзошгүй-

Багануур дүүргийн цахим хуудаст нэгэн эмэгтэйг эмэгтэйчүүд бүлэглэн зодож, зүй бусаар харьцаж байгаа дүрс бичлэг цацагдаад байгаа билээ. Тодруулбал, гуравдугаар сарын 21-ний 22:00 цагийн орчимд “Нakuhaku Hangai” гэх фэйсбүүк хаягнаас нэгэн эмэгтэйг бусдад алгадуулж, үг хэлээр доромжлуулж байгаа 44 секундын бичлэг цацагдсан юм. Хохирогч эмэгтэйг И.Э гэдэг бөгөөд уг явдал өнгөрсөн нэгдүгээр сард болсон аж.

Олон нийтийн сүлжээнд анх уг дүрс бичлэгийг нийтэлсэн иргэн нь Багануур дүүргийн хоёрдугаар хорооны Хужиртын ... хэсэгт амьдардаг Б.М гэгч байжээ. Тэрбээр 2001 онд төрсөн бөгөөд өмнө нь хоёр удаа ял шийтгэл эдэлж байсан аж. Тодруулбал, хулгайлах, залилах, хөрөнгө завших, алдаатай гүйлгээ, андуурагдсан илгээмж, гээгдэл эд хөрөнгө, алдуул мал завших зэрэг Эрүүгийн хуулийн тусгай ангийн зүйл заалтаар буруутгагдаж, ял эдэлж байсан нэгэн гэнэ. Уг бичлэгийг хэрхэн, хаанаас авсан зэргийг тогтоохоор цагдаагийн байгууллагаас саатуулан шалгаж байна. Тэрбээр хүчирхийлэл үйлдсэн эмэгтэйчүүдийг “Танина” гэж мэдүүлээд байгаа гэнэ. Тэр бүү хэл хамсаатан нь ч байж болзошгүй нөхцөл байдал тогтоогдсон гэнэ.

Түүний мэдүүлгийн дагуу цагдаагийн байгууллагаас шалгалтын ажиллагаа явуулж, И.Э гэх эмэгтэйг эрхэлсэн тодорхой ажилгүй М, О, Н нарыг Баянгол дүүргийн нутаг дэвсгэрээс өчигдөр орой дайчлан баривчилсан гэнэ. Тэд уг бичлэгийг өнгөрсөн нэгдүгээр сарын 10-ны өдөр хийсэн байж болзошгүй аж. Хохирогч И.Э-гээр хөлөө үнсүүлж, алгадаж байгаа эмэгтэй нь О болох нь тогтоогджээ.

Эх сурвалжийн мэдээлж буйгаар “Бичлэгийг олон нийтийн сүлжээнд байршуулсан Б.М нь Багануур дүүргийн хоёрдугаар хороонд бүртгэлтэй ч өнгөрсөн жил Улаанбаатар хот руу нүүсэн. Гэхдээ заримдаа Багануурт ирчихсэн харагддаг. Б.М нь дөрвөн хүүхэдтэй айлын хамгийн бага нь. Харин бичлэгт гарч байгаа эмэгтэйг огт танихгүй. Манай дүүргийнх биш юм шиг байна лээ. Бичлэгийг цацсан эрэгтэй нь манай дүүргийнх болохоор хэргийг энд шалгаж байгаа гэж сонссон” гэлээ.

Бид хэрэгтэй холбоотойгоор Багануур дүүргийн цагдаагийн газрын хэрэг бүртгэгчээс тодруулахад “Хэрэг мөрдөн байцаах шатандаа явж байгаа учраас мэдээлэл өгөх боломжгүй. Бичлэгийг олон нийтийн сүлжээнд байршуулсан этгээдийг саатуулаад байгаа” гэв.

Цагдаагийн байгууллагаас эмэгтэйчүүд нэгнийгээ ямар учраас зодож, зүй бусаар харьцсан, түүгээр ч үл барам ёс бус бичлэгээ яагаад баримтжуулж үлдээсэн гэдгийг тогтоохоор ажиллаж байна. Албан бус эх сурвалжийн мэдээлж буйгаар тэд уг бичлэгийг гэр бүл, найз нөхөд болон олон нийтийн сүлжээнд байршуулна хэмээн айлган сүрдүүлж, удаа дараа мөнгө нэхдэг байсан байж болзошгүй нөхцөл байдал тогтоогдоод байгаа. Түүнчлэн тэд хохирогч Э-г дарамталж, хүчээр биеийг нь үнэлүүлдэг байсан ч байж магадгүй гэх мэдээлэл бидэнд ирсэн юм.