"Миний охин өнөөдөр ангийнхаа хүүхэдтэй уулзана гэж яваад сураггүй алга болчихлоо. Хүүхдийн минь утас холбогдохгүй байна. Та бүхэн миний энэ зарыг шэйр хийгээд өгөөч. Танай гэрт хүүхэдтэй чинь цуг миний охин байвал хэлж өгч тус болооч” хэмээн нэгэн ээж өчигдөр буюу гуравдугаар сарын 9-нд “Замын үүдийн нэгдсэн зар, мэдээлэл” гэсэн цахим хаягт бичжээ. Тэгвэл тус охиныг олж, ар гэрийнхэнд хүлээлгэн өгсөн талаар ЦЕГ-ын Хэвлэл мэдээллийн төвөөс мэдээллээ.

Бид алга болсон гэх охиныг хаанаас олсон талаар охины ээжээс тодрууллаа. Тэрбээр “Хүүхэд маань наймдугаар ангийн сурагч. Өдөржин ангийнхаа хүүхдүүдтэй сагсан бөмбөг тоглосон юм билээ. Тэгээд харуй бүрий болчихоор нь найзындаа ороод хэсэг суусан гэсэн. Манай суманд цахилгаан тасарчихсан байсан учраас тэр үед утас нь цэнэггүй болж, бидэнтэй холбоо барьж чадаагүй юм билээ. Би хүүхдийнхээ утсыг холбогдохгүй болохоор нь айсандаа цахим сүлжээнд зар биччихсэн юм. Мөн цагдаагийн байгууллагад тэмдэглүүлчихсэн байсан. Тэгээд хүүхдээ олоод зараа устгаж, цагдаад олсон гэдгээ хэлсэн. Хилтэй ойрхон байдаг сум учраас жаахан айлаа. Миний зарыг шэйр хийж, санаа зовж байсан хүмүүст баярлалаа” гэв.