Богдхан уулын дархан цаазат газрын хамгаалалтын захиргааны эрх бүхий хоёр албан тушаалтан бусдаас 10 сая төгрөгийн хахууль авч байгаад үйлдэл дээрээ баригджээ. Тэд дархан цаазат ууланд газар олгохоор тохиролцож, авлига авах гэж байсан бөгөөд АТГ-ын ажилтнууд энэ хэргийг илрүүлэн, хэрэгт холбогдогчдыг саатуулж, хэрэг бүртгэлийн хэрэг нээсэн байна.

Тэгвэл тус хоёр албан тушаалтанд авлига өгсөн хүн нь УИХ-ын гишүүн, ТЭСО корпорацийн ерөнхийлөгч О.Цогтгэрэлийн авга дүү гэнэ. Тодруулбал, О.Цогтгэрэл гишүүний ах О.Сайнжаргалын хүү С.Эрдэнэбаяр гэх хүн юм байна. Тэрбээр Богдхан ууланд газартай болохын тулд Богдхан уулын дархан цаазат газрын хамгаалалтын захиргааны ажилтан Оюут, Монголжин хэмээх хоёр хүнд авлига өгөх гэж байгаад ийн үйлдэл дээрээ баригдсан аж. Тэднийг одоогийн байдлаар сатуулаад буй бөгөөд энэ 10 сая төгрөгийг ТЭСО корпорацийн нягтлангаас авсан гэх баримт байгаа юм байна. Өөрөөр хэлбэл, Богдхан ууланд газар авах гэсэн нь ТЭСО корпорацитай хамааралтай болох нь үүгээр нотлогдож байгаа гэнэ.

Эх сурвалжийн мэдээлж буйгаар Богдхан уулын дархан цаазат газрын хамгаалалтын захиргааны ажилтан Оюутын ах дүү, танил тал нь цагдаа, прокурорын байгууллагад ажилладаг тул цагдан хориход багагүй хүндрэл учирч, хэл ам гарсан аж. Мөн тэрбээр УИХ-ын гишүүн Ж. Мөнхбатын ангийн хүүхэд гэх мэдээлэл байна.