Өнөөдөр буюу хоёрдугаар сарын 10-нд Сонгинохайрхан дүүрэг Баянхошууны Жанцангийн хэсэгт 13 автомашин мөргөлдсөн ноцтой осол гарчээ. Энэ талаар Тээврийн цагдаагийн албаны Урьдчилан сэргийлэх ажил хариуцсан зохицуулагч, цагдаагийн дэслэгч Б.Энхболдоос тодруулахад “Сонгинохайрхан дүүргийн X хороо, Жанцан уулзварт 13 автомашин мөргөлдсөн ноцтой зам тээврийн осол гарлаа. Тодруулбал, том оврын автомашин хоёр, суудлын 11 автомашин мөргөлдсөн. Ослын улмаас жолооч хоёр, нэг зорчигч гэмтэж, эмнэлгийн байгууллагад хүргэгдсэн. Азаар хүний амь эрсдээгүй. Хэргийг Тээврийн цагдаагийн албаны Мөрдөн шалгах газар болон Тээврийн прокурортой хамтран шалгалтын ажиллагааг үргэлжлүүлж байна. Одоогийн байдлаар юунаас болж осол гарсан нь тодорхойгүй байна. Хэрэг бүртгэл, мөрдөн байцаалтын явцад тодорхой болно” гэлээ.