Цахим сүлжээнд гэмт хэргийн шинжтэй пост оруулсан иргэнийг шалгаж байна. Тодруулбал, өнгөрсөн баасан гарагт “Анхаа бол” гэх нэртэй хаягнаас “Арван жилийн наймдугаар ангийн охинтой унтаж байгаа зураг, бичлэг зарна. Хүчирхийлж байгаа хэлбэрээр хийсэн бичлэг байгаа. Холбогдох утас 8989....” хэмээн бичсэн байдаг. Тэгвэл Эрүүгийн цагдаагийн албанаас уг цахим хаяг, утасны дугаарын эзнийг шалгаж эхэлжээ.

      ЦЕГ-ын Хэвлэл мэдээллийн төвий дарга Б.Баатархүү “Эрүүгийн цагдаагийн албанд холбогдох мэдээллийг нь өгсөн. Шалгалтын ажиллагааг эхлүүлсэн” гэв.

    Харин бид дээрх утасны дугаар руу холбогдож, иргэн А-аас энэ талаар тодрууллаа. Тэрбээр “Миний нэр, зургаар фэйсбүүк хаяг нээж, миний дугаарыг бичээд худал зар оруулсан байна. Миний үндсэн өөрийн хаягнаас ийм ёс бус зар оруулаагүй. Өнгөрсөн баасан гарагаас миний утас руу олон хүн залгаж, доромжиллоо. Би хуулийн байгууллагад хандсан. Эрүүгийн цагдаагийн албанд өнөөдөр 10:00 цагийн үед очиж, мэдүүлэг өгнө. Мөн дүүрэг, хорооны цагдаад өргөдөл өгч, шалгуулахаар болсон. Би эхнэр, хоёр хүүхэдтэйгээ амьдардаг. Юу гэж тийм бусармаг зүйл хийх билээ. Энэ бол гүтгэлэг, миний нэр төрд халдаж байгаа хэрэг. Ах, дүү, хамаатан садан маань энэ постыг хараад хямралд орж, гайхаж байна” гэлээ.